Қозоғистонда 16 ёшга тўлмаганларга ижтимоий тармоқларда аккаунт очиш тақиқланиши мумкин

Қозоғистонда «ваколатли орган талабларини бажармаган» онлайн платформаларга кириш блокланиши мумкин. Бундай норма республика Маданият ва ахборот вазирлиги томонидан таклиф этилган тузатишлар лойиҳасида мавжуд.

«Онлайн-платформалар мулкдорлари ва (ёки) қонуний вакиллари (ваколатхоналари) томонидан ваколатли органнинг кўрсатмалари бажарилмаган тақдирда, ваколатли орган онлайн-платформага киришни Интернет-ресурслар, онлайн-платформалар ва тезкор хабар алмашиш хизматларидан фойдаланишни чеклаш тўғрисидаги қоидаларга мувофиқ блоклайди», дейилади эълон қилинган ҳужжатда.

Платформалар Маданият вазирлиги талабига биноан тақиқланган материалларни олиб ташлаши, беш мингдан ортиқ обуначига эга бўлган аноним аккаунтлар ҳақида маълумот бериши, контентни тўғри маркировка қилиши шарт бўлади.

Худди шу лойиҳада 16 ёшгача бўлган болаларнинг ижтимоий тармоқларда рўйхатдан ўтишини тақиқлаш таклиф қилинган. Ушбу кўрсатмалардан бирортасининг бажарилмаслиги ресурсдан фойдаланишни чеклаш учун асос бўлиши мумкин.

Вазирлик тушунтириш хатида янги нормалар хавфсиз ахборот муҳитини шакллантириш ва онлайн платформалардаги ноқонуний контент ҳажмини камайтириш учун зарурлигини кўрсатган. Ҳужжат муаллифларининг қайд этишича, унинг қабул қилиниши бюджетдан молиявий харажатларни талаб қилмайди ва салбий ижтимоий-иқтисодий оқибатларга олиб келмайди.

Аввалроқ, Австралия 16 ёшга тўлмаганларга ижтимоий тармоқларда аккаунт очишни тақиқлаган биринчи давлат бўлган эди.

Кейинроқ, Малайзия ҳукумати 16 ёшга тўлмаган шахсларга ижтимоий тармоқларда аккаунт очишни 2026 йилдан бошлаб тақиқлаш режасини эълон қилди.