Франция ташқи ишлар вазири X ижтимоий тармоғининг жаримага тортилишини "бу фақат бошланиши" деб изоҳлади

Франция ташқи ишлар вазири Жан-Ноэл Барро америкалик тадбиркор Илон Маскнинг ижтимоий тармоғига 120 миллион евро жарима солиниши "фақат бошланиши" эканлигини айтди.

Аввалроқ Европа комиссияси расмий вакили Тома Ренйе Еврокомиссия рақамли хизматлар тўғрисидаги қонунни бузгани учун X платформаси 120 миллион евро жаримага тортилганини маълум қилганди.

"Бизда йирик платформалар учун шаффофлик мажбурий тусга эга. Қоида ҳаммага бир хил. TikTok буни қабул қилди, X рад этди. Еврокомиссия кескин чора кўрди ва тўғри қилди. Бу фақат бошланиши", - деб ёзди Барро ўзининг X ижтимоий тармоғидаги саҳифасида.

Еврокомиссия июлда X тармоғини Евроиттифоқнинг рақамли хизматлар тўғрисидаги қонунини бузаётгани ҳақида огоҳлантирган, қонунбузилишлар бартараф қилинмаган тақдирда компанияга йиллик айланмасининг 6 фоизигача миқдорда жарима солиш билан таҳдид қилганди.

Евроиттифоқда рақамли хизматлар тўғрисидаги қонун 2023 йил августдан кучга кирган. Унга кўра, рақамли платформалар ирқчилик, гиёҳвандлик моддалари ва қалбаки маҳсулотлар савдоси, болалар порнографияси ва дезинформацияга қарши курашиши шарт. 

Еврокомиссия аниқланган қонунбузилишлар тўғрисида X, Meta, TikTok каби йирик платформаларга мунтазам равишда огоҳлантиришлар юборади ва санкциялар қўллаш билан таҳдид қилади.