Ҳокимлик Нурафшонда прокуратура учун 4,5 млрд сўмга автотураргоҳ қурилаётгани ҳақидаги хабарлар бўйича изоҳ берди

Тошкент вилояти ҳокимлиги ахборот хизмати ижтимоий тармоқларда Нурафшон шаҳрида Тошкент вилояти прокуратураси учун автотураргоҳ қурилиши юзасидан тарқалган муҳокамалар бўйича муносабат билдирди.

Маълум қилинишича, шаҳарда вилоят прокуратурасига қарашли салкам 1 гектар майдонда инфратузилмани яхшилаш бўйича комплекс лойиҳа молиялаштириляпти. Бу бўйича вилоят ҳокимининг қарори қабул қилинган.

Қарорда ҳудудда автотураргоҳ, хизмат кўрсатиш, электромобилларни зарядлаш нуқталари, яшил майдонлар, пиёдалар йўлаклари, дренаж ва ирригация тизимлари қурилиши, қуёш панелларини ўрнатиш назарда тутилган.

“Ажратилаётган 4,5 миллиард сўмни фақатгина автотураргоҳ учун деб талқин этмаслик тўғри бўларди. Қарор матнида муайян сабабларга кўра, маблағ ажратиш мақсади “автотураргоҳ мажмуаси қуриш учун” деб эмас, “автотураргоҳ қуриш учун” деб изоҳлангани шундай баҳсли муҳокамаларга сабаб бўлганини тушунган ҳолда қўшимча изоҳ беришни лозим топдик”, дейилади ҳокимлик муносабатида.

Таъкидланишича, лойиҳа қиймати 5,9 млрд сўмга баҳоланган. Вилоят ҳокимлиги ва буюртмачи хизмати мутаҳассислари тарафидан объектнинг курилиш-монтаж ишлари қиймати қайта кўриб чиқилиб, айрим иш турлари мувофиқлаштирилиши натижасида умумий харажат миқдори 4,5 млрд сўмга мақбуллаштирилган.