Time журнали сунъий интеллект меъморларини «йил одами» деб эълон қилди

Улар ҳозирги замонни ўзгартиргани ва инсоннинг 2025 йилдаги имкониятлари чегараларини кенгайтиргани учун эътирофга сазовор бўлди.

Фото: TIME

Сунъий интеллект асосчилари Американинг Time журнали томонидан 2025 йил одами унвонига сазовор бўлди.

«2025 йил сунъий интеллектнинг бутун салоҳияти тўлиқ намоён бўлган ва ортга йўл йўқлиги аён бўлган йил бўлди. Ўйловчи машиналар даври ҳақиқатга айлангани учун; инсониятни ҳайратга ва ташвишга солгани учун; ҳозирги замонни ўзгартиргани ва инсоннинг 2025 йилдаги имкониятлари чегараларини кенгайтиргани учун сунъий интеллект меъморлари Time йил одами бўлди», дейилади журналнинг ижтимоий тармоқлардаги саҳифасида.

Журнал муқовасига Meta раҳбари Марк Цукерберг, AMD бош директори Лиза Су, xAI, SpaceX ва Tesla раҳбари Илон Маск, Nvidia раҳбари Женсен Хуан, OpenAI раҳбари Сэм Алтман, DeepMind бош директори Демис Хассабис, Anthropic раҳбари Дарио Амодей ва ImageNet асосчиси Фей-Фей Ли жойлаштирилди. Уларнинг барчаси пўлат тўсин устида ўтирибди, тасвирнинг ўзи эса 1932 йилда олинган «Осмонўпар бинодаги тушлик» суратига ишора қилади.

Time журнали 1927 йилдан бери йил одамини аниқлаб келмоқда. У сўнгги 12 ой ичида дунёга энг катта таъсир кўрсатган шахс, гуруҳ ёки тушунча бўлиши мумкин, бунда унинг фойда ёки зарар келтиргани аҳамиятсиз.

2024 йилда бу унвонни АҚШ президенти Доналд Трамп олган эди.

Тайёрлаган: Сардор Юсупов

#сунъий интеллект #Time #йил одами