Усмон Дембеле ФИФА талқинига кўра йилнинг энг яхши футболчиси бўлди

Франция миллий жамоаси ва «ПСЖ» клуби яримҳимоячиси Усмон Дембеле ФИФА томонидан 2025 йилнинг энг яхши футболчиси деб топилди. Аввалроқ, у France Football нашри томонидан «Олтин тўп» соҳиби деб эълон қилинган эди. Ўтган мавсумда «ПСЖ» Франция чемпионати, Кубоги, Суперкубоги, Чемпионлар Лигаси ва УЕФА Суперкубогида ғалаба қозонди, шунингдек, Клублар ўртасидаги жаҳон чемпионатида иккинчи бўлди.

Дембеле соврин учун курашда Ашраф Ҳакими («ПСЖ» ва Марокаш), Ҳарри Кейн («Бавария» ва Англия), Килиан Мбаппе («Реал» ва Франция), Нуну Мендеш («ПСЖ» ва Португалия), Коул Палмер («Челси» ва Англия), Педри («Барселона» ва Испания), Рафиня («Барселона» ва Бразилия), Муҳаммад Салоҳ («Ливерпул» ва Миср), Витиня («ПСЖ» ва Португалия) ва Ламин Ямал («Барселона» ва Испания) каби футболчиларни ортда қолдирди.

«Энг яхши мураббий» номинациясида «ПСЖ» клубининг испаниялик бош мураббийи Луис Энрике ғолиб бўлди. У соврин учун курашда Хавиер Агирре (Мексика), Микел Артета («Арсенал»), Ҳанс-Дитер Флик («Барселона»), Энцо Мареска («Челси»), Роберто Мартинес (Португалия) ва Арне Слот («Ливерпул») каби мураббийларни ортда қолдирди.

Йилнинг энг яхши дарвозабони номинациясида Жанлуижи Доннарумма («ПСЖ»/«Манчестер Сити» ва Италия) эътироф этилди. У соврин учун курашда Алиссон Беккер («Ливерпул» ва Бразилия), Тибо Куртуа («Реал» ва Белгия), Эмилиано Мартинес («Астон Вилла» ва Аргентина), Мануэл Нойер («Бавария» ва Германия), Давид Райя («Арсенал» ва Испания), Ян Зоммер («Интер» ва Швейцария) ва Войцех Шченсни («Барселона» ва Полша) каби футболчиларни ортда қолдирди.

Тарихда илк бор Чемпионлар Лигасида ғолиб чиққан «ПСЖ» клубининг 5 нафар футболчиси 2025 йил якунларига кўра ФИФА рамзий терма жамоасига киритилди.

The Best маросимида йил жамоаси таркибига қуйидаги футболчилар киритилди: Жанлуижи Доннарумма («ПСЖ»/«Манчестер Сити»), Ашраф Ҳакими, Виллиан Пачо (иккаласи ҳам «ПСЖ»), Виржил ван Дейк («Ливерпул»), Нуну Мендеш («ПСЖ»), Коул Палмер («Челси»), Жуд Беллингэм («Реал»), Витиня («ПСЖ»), Педри, Ламин Ямал (иккаласи ҳам «Барселона»), Усмон Дембеле («ПСЖ»).

Ўтган мавсумнинг энг чиройли голи учун Пушкаш мукофотини аргентиналик Сантяго Монтиэл қўлга киритди.

The Best мукофоти ғолибларини танлашда 2024 йил 11 августдан 2025 йил 2 августгача бўлган даврдаги ўйинлар ҳисобга олинди. Ғолиб терма жамоа сардорлари ва мураббийлари, мухлислар ва ОАВ вакиллари томонидан овоз бериш йўли билан аниқланди.