Nestle хавфли токсин туфайли кўплаб мамлакатларда болалар озуқасини қайтариб олмоқда

Швейцариянинг Nestle компанияси тез эрийдиган қуруқ сут ва сут-қатиқ аралашмалари ва шифобахш парҳез овқатланиш аминокислоталари асосидаги қуруқ аралашманинг бир қисмини Россияда савдодан ихтиёрий равишда олиб ташламоқда.

Бу «ташқи таъминотчидан хомашё (арахидон кислотаси) таркибида цереулид токсини мавжудлиги эҳтимолий хавфи аниқлангани» сабабли эҳтиёт чораси сифатида амалга оширилмоқда, деб хабар берди «Nestle Russia».

Арахидон кислотаси (ARA) - бу она сутида табиий равишда мавжуд бўлган Омега-6 кўп тўйинмаган ёғ кислотаси. У болаларнинг нормал ўсиши ва ривожланиши учун, айниқса, мия, асаб тизими ва суяк-мушак тизимининг шаклланиши учун зарур. Компания аралашмалар таркибини она сутига максимал даражада яқинлаштириш ва чақалоқларни тўлақонли озиқлантириш учун аралашмаларга ARA қўшади. Цереулид Bacillus cereus бактериясининг баъзи штаммлари томонидан ишлаб чиқариладиган токсин. У иссиққа чидамли бўлиб, кўнгил айниши ва қусишга олиб келиши мумкин.

Компания «таъсир кўрсатиши мумкин бўлган болалар озиқ-овқат маҳсулотларининг чекланган партиялари» қайтариб олинаётганини таъкидлади. «Қайтариб олиш бошқа партияларнинг маҳсулотларига ва Россияда Nestle компанияси томонидан тақдим этилган бошқа ҳар қандай болалар озиқ-овқат маҳсулотларига таъсир қилмайди», деб тушунтирди компания.

Reuters маълумотларига кўра, Nestle Европанинг кўплаб мамлакатларида, жумладан, Австрия, Дания, Финляндия, Франция, Германия, Ирландия, Италия, Норвегия, Швейцария ва Буюк Британияда SMA, BEBA ва NAN болалар аралашмалари партияларини қайтариб олмоқда. Аввалроқ, Қозоғистонда ҳам шундай чора кўрилаётгани ҳақида хабар берилган эди.

Австрия Соғлиқни сақлаш вазирлиги қайтариб олиш жараёни 10 дан ортиқ Nestle заводларининг 800 дан ортиқ маҳсулотларига таъсир қилганини ва бу компания тарихидаги энг йирик қайтариб олиш жараёни эканини эълон қилди.

Ўз навбатида, Nestle вакилининг агентликка маълум қилишича, бундай аралашмаларнинг истеъмол қилиниши оқибатида ҳеч қандай касаллик ёки аломатлар аниқланмаган.