Бола боғчада ва бошланғич таълимда ўз она тилида тарбия кўриши керак - Алишер Қодиров

«Миллий тикланиш» демократик партияси фракцияси раҳбари Алишер Қодиров ўзбек тилида «тили чиққан» болани рус синфга бериш бола манфаатларининг бузилиши эканини айтди.

Фото: Олий Мажлис Қонунчилик палатаси

Биз бугун афсуски болаларни бегона тилда тарбия кўришга, бошланғич таълим олишга мажбур қиляпмиз ва бунинг оқибатида болалардан мактабда кутган билимни, боғчада кутган тарбияни ололмаяпмиз. Бу ҳақда «Миллий тикланиш» демократик партияси фракциясининг раҳбари Алишер Қодиров Қонунчилик палатасида тазйиқ ва зўравонликдан жабр кўрган хотин-қизларни ҳимоя қилиш тизимини кучайтириш, шунингдек боланинг энг устун манфаатларини таъминлашга қаратилган қонун лойиҳасини биринчи ўқиш жараёнида айтиб ўтди.

«Бола боғчада ва бошланғич таълимда ўз она тилида тарбия кўриши керак ва илм олишнинг пойдеворини бошлаши керак. Биз бугун афсуски болаларни бегона тилда тарбия кўришга, бошланғич таълим олишга мажбур қиляпмиз ва бунинг оқибатида болалардан мактабда кутган билимни, боғчада кутган тарбияни ололмаяпмиз... Негадир одамлар бу хатони тан олишни хоҳламаяпти. Афсуски, бу педагогикада исботини топган муаммо. Ва қонунда бунинг акс этиши жудаям маъқул, буни қўллаб-қувватлаймиз. Фақат битта таклиф. «Таълим тўғрисида»ги қонунда таълим тилини танлаш эркинлиги белгилаб қўйилган. Буни мактабгача таълим ва бошланғич таълимда ҳар бир боланинг устун манфаати сифатида ўз она тилида тарбия кўриши ва бошланғич таълим олиш мажбуриятини таъкидлаб қўйишимиз керак. Бугун бола бегона тилда тарбия олишга мажбурланяпти ва тарбия олмаяпти. Бегона тилда бошланғич таълим олишга мажбурланяпти ва бошланғич таълим олмаяпти. Оқибатда бола тарбиясиз ва таълимсиз бўлиб қоляпти», деди Алишер Қодиров.

Унинг сўзларига кўра, қонун лойиҳаси ташаббускорлари бунга эътибор қаратиши керак ва «Миллий тикланиш» демократик партияси фракцияси лойиҳани иккинчи ўқиш жараёнида ушбу таҳрирни шакллантириш ва такомиллаштиришга эришади.