Болага ота исмини фамилия сифатида беришга рухсат этилиши мумкин

Болага ота исмини фамилия сифатида беришга рухсат этилиши мумкин. Олий Мажлис Қонунчилик палатасининг 13 январдаги мажлисида депутатлар Оила кодексига шу ҳақда қўшимча киритиш кўзда тутилган қонун лойиҳасини биринчи ўқишда қабул қилди.

Ушбу лойиҳа билан Оила кодексининг 69-моддасига қўшимча киритиш таклиф этилмоқда. Бу моддада боланинг фамилияси ота-онанинг фамилиясига қараб белгиланиши кўзда тутилган.

Мажлисда сўзга чиққан Адлия вазири ўринбосари Нуъмон Муҳаммадиев ҳозирги кунда ота ёки она томонидан болага миллий анъаналарга кўра, бобонинг исми бўйича фамилия берилаётганини билдирди.

«Ҳозирги вақтда ота исмини болага фамилия сифатида бериш имкониятининг йўқлиги қонунчилик ҳужжатларини турлича талқин қилинишига ҳамда фуқароларнинг ҳақли эътирозига сабаб бўлмоқда. Масалан, болалар уйида улғайганлар ёки оталик ҳуқуқидан маҳрум қилинган шахсларнинг фарзанди ўз боласига оталик ҳуқуқидан маҳрум қилинган отанинг исмини фамилия сифатида беришни хоҳламаяпти», деди Муҳаммадиев.

Унинг сўзларига кўра, бундай ҳолларда ота-она маълум муддатдан сўнг, фарзандининг туғилгани ҳақидаги далолатномаларга ўзгартириш киритиш орқали ўз фамилиясини бермоқда.

Адлия вазири ўринбосари халқаро тажриба ҳам ўрганилганини, Россия, Қозоғистон, Қирғизистон ва Тожикистон ҳамда қўшни Туркманистонда боланинг фамилияси нафақат бобо, балки ота исми бўйича ҳам берилиши белгилаб қўйилганини билдирди.

Шулардан келиб чиққан ҳолда, Оила кодексининг 69-моддасига отанинг исмини болага фамилия сифатида бериш бўйича қўшимчалар киритиш таклиф этилди.