Оқ уй Даниянинг Гренландияни ҳимоя қила олишига шубҳа билдирди

Гренландияни фақат уни ҳимоя қиладиганларгина назорат қилиши мумкин, Дания эса бунга жуда кичиклик ва ожизлик қилади, деди Оқ уй маъмурияти раҳбарининг ўринбосари, АҚШ президентининг ички хавфсизлик бўйича маслаҳатчиси Стивен Миллер Fox News телеканалига берган интервюсида.

У шунингдек, ҳудудни назорат қилиш ҳуқуқи уни ҳимоя қила олиш қобилиятига асосан белгиланиши тамойили 500дан буён мавжудлигини айтди. 

«Дания — кичик иқтисодиёт ва кичик армияга эга митти давлат. У Гренландияни ҳимоя қила олмайди. У Гренландия ҳудудини назорат қила олмайди», — деди Миллер.

Гренландия — Даниянинг автоном ҳудуди. Орол Дания таркибида НАТОнинг бир қисми ҳисобланади. Доналд Трампнинг сўзларига кўра, Гренландия АҚШ миллий хавфсизлиги, шунингдек Арктика минтақаси хавфсизлиги учун ҳал қилувчи аҳамиятга эга. Оқ уй раҳбари таъкидлашича, у ерда Россия ва Хитой фаоллиги кучайган. Трамп версиясига кўра, орол режалаштирилаётган АҚШ ракетага қарши мудофаа тизими — “Олтин гумбаз” (Golden Dome)ни яратиш учун ҳам муҳим.

Аввалроқ АҚШ президенти Вашингтон Гренландия устидан назоратни “қандай бўлмасин” қўлга киритиши кераклигини айтган эди. Оқ уй эса АҚШ армиясини Гренландияни “қўшиб олиш” учун ишга солиш Доналд Трамп учун олий бош қўмондон сифатида “вариантлардан бири” эканини маълум қилган.

Трампнинг таҳдидлари ортидан Европа давлатлари Гренландияга оз сонли ҳарбий ходимларни юборди.