Трамп Европанинг қатор мамлакатларига нисбатан божлар киритилишини эълон қилди

АҚШ президенти Доналд Трамп Дания, Норвегия, Швеция, Франция, Германия, Буюк Британия, Нидерландия ва Финландияга нисбатан божлар жорий этилишини эълон қилди.

"2026 йил 1 февралдан бошлаб юқорида номлари тилга  олинган мамлакатларнинг АҚШга етказиб берадиган барча маҳсулотлари учун ўн фоизлик бож жорий этилади", — деб ёзди у Truth Social ижтимоий тармоғида.

Унинг қайд этишича, 1 июндан тариф 25 фоизга оширилади, божлар эса "Гренландия тўлиқ ва якуний жиҳатдан қўлга киритилмагунча" амал қилади. 

Трампнинг сўзларига кўра, АҚШ узоқ йиллар давомида Дания ва ЕИнинг барча мамлакатларига субсидия бериб келган. Энди эса улар Гренландиянинг олинишига тўсқинлик қилиб, "хавфли ўйин қилишмоқда".

Аввалроқ Оқ уй маъмурияти раҳбарининг ўринбосари, АҚШ президентининг ички хавфсизлик бўйича маслаҳатчиси Стивен Миллер Гренландияни фақат уни ҳимоя қиладиганларгина назорат қилиши мумкинлиги, Дания эса бунга жуда кичиклик ва ожизлик қилишини айтганди.

Шу ҳафтада Дания ва Гренландия ташқи ишлар вазирлари Оқ уйда АҚШ давлат котиби Марко Рубио ва вице-президент Жей Ди Вэнс билан учрашув ўтказди, лекин Американинг Гренландия бўйича нуқтаи назарини ўзгартиришга эриша олмади.

Европа мамлакатлари оролга ўз ҳарбийларини жўнатишга тайёрлигини билдирган, аммо Оқ уй матбуот котиби Каролин Левиттнинг сўзларига кўра, бу АҚШ президентининг режаларига ҳеч қандай таъсир кўрсатмайди.