Андижон вилояти ҳокимининг 7 йилга қамалган собиқ ўринбосари Ботиржон Ҳамроев озодликка чиқди

Андижон вилояти ҳокимининг собиқ ўринбосари Ботиржон Ҳамроев озодликка чиқди. Апеллция суди 7 йил муддатга озодликдан маҳрум қилинган собиқ “замҳоким”га тайинланган жазони зарар қоплангани учун ўзгартирди.

Kun.uz танишган суд ажримида келтирилишича, Ботиржон Ҳамроев билан боғлиқ жиноят иши доирасида қарийб 30 киши судланган. Уларнинг бир нечтаси Андижон вилоятидаги турли МЧЖлар вакиллари бўлса, аксарияти “Агробанк” АТБ Андижон вилоят бошқармаси мансабдорлари ҳисобланади.

Суд ҳукмига кўра, ҳудуддаги МЧЖлардан бирининг таъсисчиси “Агробанк” АТБ томонидан иссиқхоналар барпо этиш учун ажратилиши белгиланган имтиёзли кредитдан фойдаланиш билан боғлиқ муносабатларни тўлиқ қўлга киритиш орқали даромад орттиришни режалаштирган. У бунинг учун Андижон вилоят ҳокимлиги ва “Агробанк” АТБ Андижон вилояти бошқармаси мансабдор шахсларини иссиқхона комплексларини маҳаллийлаштиргани, ҳар қандай миқдорда етказиб бериши мумкинлигига ишонтирган. Шундан сўнг уюшган гуруҳ аъзолари ўртасида вазифалар тақсимланган. Ботиржон Ҳамроев ҳам ушбу уюшган гуруҳ аъзоси бўлгани келтирилган.

Суд ҳужжатида қайд этилишича, Ботиржон Ҳамроев маҳаллий ҳокимлик идораси мансабдор шахси сифатида ажратилаётган имтиёзли кредит маблағларини фақатгина муайян жамиятга йўналтириш ҳамда кредит ажратилишини жадаллаштириш борасида “Агробанк” АТБ Андижон вилояти бошқармаси мансабдор шахсларига кўрсатмалар бериб борган.

ЖИБ Юнусобод туман судининг 2025 йил 8 июлдаги ҳукми билан Ботиржон Ҳамроев 7 та эпизод бўйича оқланган. У Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми “а,в” бандлари билан айбли деб топилган ҳамда 3 йил маҳаллий ҳокимият органлари тизимида ишлаш ҳуқуқидан маҳрум қилинган ҳолда 7 йил озодликдан маҳрум қилиш жазосига тортилган.

Тошкент шаҳар суди ахборот хизатининг маълум қилишича, ЖИБ Юнусобод туман суди томонидан мансаб ваколатини суиистеъмол қилиш, ўзганинг мулкини ўзлаштириш ёки растрата қилиш йўли билан талон-торож қилиш ва бошқа жиноятларни содир этганликда айбланган жами 29 нафар судланувчига оид жиноят иши кўрилиб, суднинг 2025 йил 8 июлдаги ҳукми билан тегишли жазолар тайинланган.

Суд ҳукмига нисбатан туман прокурорнинг протести ва судланувчиларнинг шикоятларига асосан жиноят иши Тошкент шаҳар суди апеллецияси инстанциясида кўрилиб, ҳукмнинг 24 нафар судланувчига тегишли қисмлари ўзгартирилган.

Хусусан, Тошкент шаҳар суди жиноят ишлари бўйича судлов ҳайъати апелляция инстанциясининг 2025 йил 26 декабрдаги ажримига асосан биринчи инстанция суди ҳукми билан Ботиржон Ҳамроевга тайинланган жазо жиноят оқибатида етказилган зарар қоплангани муносабати билан иш ҳақининг 20 фоизини давлат даромадига ундириб бориш шарти билан 2,5 йил муддатга ахлоқ тузатиш ишлари жазосига ўзгартирилган.

Унинг 2024 йил 12 октябрдан 2025 йил 26 декабргача қамоқда сақланган кунларининг ҳар бир куни ахлоқ тузатиш ишлари жазосининг уч кунига тенглаштирилган ҳолда чегирилиб, тайинланган ахлоқ тузатиш ишлари жазоси ўталган деб ҳисобланган. Шу тариқа, Ботиржон Ҳамроевга нисбатан қўлланган “қамоққа олиш” тарзидаги эҳтиёт чораси бекор қилиниб, у суд залидан дарҳол озод қилинган.

Қайд этилишича, Жиноят кодекси 167-моддасининг 5-қисмига кўра, етказилган моддий зарарнинг ўрни қопланган тақдирда озодликни чеклаш ва озодликдан маҳрум қилиш тариқасидаги жазо қўлланилмайди. Ботиржон Ҳамроевга нисбатан тайинланган муайян ҳуқуқдан маҳрум қилиш жазоси ўзгаришсиз қолдирилган.

Ботиржон Ҳамроев 2019 йилдан қамоққа олингунига қадар Андижон вилояти ҳокими ўринбосари сифатида фаолият олиб борган.