Эрон норозилик намойишларида 3 мингдан ортиқ одам ҳалок бўлганини расман эълон қилди

Эрон расмийлари оммавий норозилик намойишлари қурбонлари ҳақидаги расмий маълумотларни эълон қилиб, 3117 киши ҳалок бўлганини маълум қилди. Бу ҳақда мамлакат Ички ишлар вазирлигига таяниб Euronews хабар берди.

Ҳалок бўлганларнинг 2427 нафари тинч аҳоли ва хавфсизлик кучлари ходимлари бўлган. Қолганлар ҳақида маълумот берилмади.

Таъкидланишича, бу рақамлар инсон ҳуқуқлари ташкилотлари берган баҳолардан анча паст. Масалан, АҚШда жойлашган HRANA (Human Rights Activists) агентлиги камида 4902 қурбон ҳақида хабар берган бўлса, Reuters’нинг Эрон расмийлари орасидаги манбаси 18 январ куни «тасдиқланган» 5000 қурбон ҳақида маълум қилиб, бу рақам «сезиларсиз даражада ошиши» мумкинлигини таъкидлади.

Euronews нашрининг қайд этишича, Эрон расмийлари норозилик намойишлари чоғида интернет ва халқаро қўнғироқларни тўсиб қўйган, шунингдек, журналистлар фаолиятини чеклаган, бу эса зўравонлик кўламини мустақил баҳолашни қийинлаштирган. Шу билан бирга, давлат ташвиқот ресурслари намойишчиларни АҚШ ва Исроил томонидан мотивация қилинган «исёнчилар» сифатида кўрсатган.

Иқтисодий қийинчиликлар фонида 28 декабр куни бошланган норозилик намойишлари умуммиллий чиқишларга айланиб кетди. HRANA маълумотларига кўра, қарийб 26,5 минг киши ҳибсга олинган. Эрон суд тизими вакили Асқар Жаҳонгирнинг таъкидлашича, ҳибсга олинганларнинг баъзилари «Худога қарши исён»да айбланмоқда, мамлакат Жиноят кодексига кўра уларга ўлим жазоси белгиланиши мумкин.

Аввалроқ, эронлик намойишчиларга ёрдам ваъда қилган АҚШ президенти Доналд Трамп 16 январ куни Теҳрон 800 нафардан ортиқ намойишчига нисбатан ўлим жазосини ижро этишдан бош тортганини айтиб, Эронга зарба бермасликка қарор қилганини таъкидлади. Бироқ, эртаси куниёқ прокурор Али Солиҳий Трампнинг сўзларини «сафсата ва бемаъни» деб атади ва кўплаб ишлар аллақачон судларга ўтказилганини маълум қилди. Эрон олий раҳбари Али Хоминаий, ўз навбатида, «ички жиноятчилар»ни аямасликни талаб қилди. Кўп ўтмай Трамп «Эрон учун янги раҳбарият излаш вақти келганини» айтиб, Хоминаийни «касал одам» деб атади.