Самарқандда хориждаги фестивалга ўз фарзандларини юборган мансабдорлардан 28 млн сўм ундирилди

Вазирликка таниш-билишчиликка йўл қўйган расмийларни ишдан бўшатиш ҳақида тақдимнома ҳам киритилган.

Фото: Петр Ковалев/ТАСС

Россиянинг Санкт-Петербург шаҳрида ўтказилган «Алвон елканлар» номли битирувчилар байрамига Самарқанд вилоятидан иқтидорли ёшлар ўрнига фарзанди, жияни ва яқинларини хорижга юборган маҳаллий расмийлар 28 млн сўмни бюджетга қайтаради. Бу ҳақда Коррупцияга қарши курашиш агентлиги раҳбари Акмал Бурхонов маълум қилди.

У Самарқанд вилояти мактабгача ва мактаб таълими бошқармаси мансабдор шахслари томонидан қонунбузарликка йўл қўйилганини таъкидлаган.

«Дастлабки ўрганишлар натижасида бу воқеа ўз тасдиғини топди. Россия томонидан вилоят ҳокимлигига таклифнома берилган, ҳокимлик вилоят мактабгача ва мактаб таълими бошқармасига йўналтирган.

Саккиз ўқувчи ва икки ўқитувчи юборилган. Шундан икки нафари – бошқарма бошлиғининг яқин қариндоши, яъни фарзанди ва жияни, яна икки нафари бошқарма ҳисобчиси ва методистининг фарзандлари бўлиб чиқди, яна бир нафари бошқарма бошлиғининг яқин танишининг ўғли бўлиб чиқди.

Уларнинг бориб келиши учун маҳаллий бюджетдан 95 миллион сўм ажратилган экан. Уч боланинг ота-онасидан 28 миллион сўм маҳаллий бюджетга қайтарилди», дея Бурхоновнинг сўзларини келтирмоқда Kun.uz мухбири.

Бундан ташқари, ўрганишлар натижасида ушбу ҳолат давлат хизматчиларининг одоб-ахлоқ қоидаларига зид экани ҳақида Мактабгача ва мактаб таълими вазирлиги раҳбариятига тақдимнома киритилган, унда айбдорларга қатъий чоралар кўриш сўралган.

«Ўрганишлар натижасида 28 миллионни қайтардик. Яна бир бор ўрганиб, яна бюджетга зарар етказилган бўлса уни ҳам қайтариш, шунингдек, таниш-билишчилик ҳолатларига йўл қўйгани учун мутасаддиларга, биринчи навбатда, бошқарма раҳбарига ҳамда бошқа айбдорларга кескин чора кўриш, яъни лавозимдан озод этишгача бўлган чоралар кўриш бўйича тақдимнома киритдик. Бу бўйича ўн кун ичида жавоб берилиши керак», деган Бурхонов.

Шу кунларда Санкт-Петербургда ўтказилган «Алвон елканлар» битирувчилар байрамига Самарқанд вилоятидан юборилган мактаб ўқувчилари рўйхати жамоатчилик эътирозларига сабаб бўлганди.

Kun.uz сайтида эълон қилинган материалда саёҳатга борганлар орасида вилоят мактабгача ва мактаб таълими бошқармаси бошлиғининг ўғли ва жияни, шунингдек бошқа масъулларнинг фарзандлари ҳам борлиги аниқлангани маълум қилинганди.

Вилоят мактабгача ва мактаб таълими бошқармаси ҳолат юзасидан билдирган муносабатида дастлаб мазкур тадбир учун 14 нафар иқтидорли ўқувчи ва 1 нафар масъулдан иборат делегация шакллантирилгани, аммо айрим ўқувчиларнинг хорижга чиқиш паспортлари ўз вақтида тайёр бўлмагани ва айримларининг ота-оналари сафарга рухсат бермагани сабабли рўйхат ўзгартирилганини маълум қилганди.