Li 9 ва BYD тўқнашуви: Тошкент судлари яна шов-шувли иш марказида

Тошкент шаҳрида Li 9 ва BYD’нинг ўзаро тўқнашуви машиналар чидамлилигини эмас, кўпроқ Тошкент шаҳар судларидаги одил судловни синовдан ўтказмоқда: дастлабки суд Li 9 катта тезликда келиб урган BYD машинаси ҳайдовчиси зиммасига 798 млн сўм моддий зарарни юклаб қўйганди, апелляция суди ушбу қарорни бекор қилиб, ишни терговга қайтариб юборди.

Фото: Ижтимоий тармоқлар

2025 йил 30 сентябр куни Тошкент шаҳрининг Мирзо Улуғбек туманида BYD ва Lixiang L9 машиналари ўзаро тўқнашиши оқибатида йўл-транспорт ҳодисаси содир бўлганди. Ижтимоий тармоқларда тарқалган фото ва видеоларда ЙТҲ оқибатида Li 9 машинаси парчаланиб кетгани акс этган.

Ушбу ЙТҲ билан боғлиқ маъмурий иш ЖИБ Мирзо Улуғбек туман судида кўриб чиқилган. Суднинг 2025 йил 23 декабрдаги қарорида келтирилишича, BYD бошқарувида бўлган Д.Р ўз ҳаракат йўналишини ўнгдан чапга ўзгартириши чоғида Ф.Ж. бошқарувидаги Li 9 машинаси билан тўқнашув содир қилган.

Суд ҳужжатида BYD ҳайдовчиси «Йўл харакати қоидалари»нинг 53-банди, яъни «ҳайдовчи ҳаракатланишни бошлаш, манёвр қилиш (қайта тизилиш, бурилиш, қайрилиб олиш, қувиб ўтиш ва айланиб ўтиш) ва тўхташдан олдин бажарилаётган манёвр бошқа йўл ҳаракати иштирокчиларининг ҳаракатланишига хавф туғдирмаслиги керак» деган талабларни бузгани келтирилган.

Мазкур йўл-транспорт ҳодисаси BYD машинасидаги камерада ёзиб олинган. Унда BYD 60-62 км/соат тезликда ҳаракатланиб кетаётган бўлгани, Li 9 эса катта тезликда келиб, ўз йўналишини ўзгартирган BYD’га тегиб ўтгани ва ағдарилиб кетгани акс этган.

Суд экспертиза марказининг 2025 йил 1 декабрдаги судга оид автотехника экспертиза хулосасида ЙТҲ пайтида Li 9 машинасининг тезлигини экспертиза орқали аниқлаш имконияти йўқлиги, «BYD машинаси 2-3 метрдан йўналишини чапга ўзгартирган бўлса, ушбу вазиятда Li 9 автомобили 60 км/соат тезликда ҳаракатланиши натижасида йўл транспорт ҳодисаси олдини олишнинг техник имконияти мавжуд эмаслиги» келтирилган.

Суд қарори билан BYD ҳайдовчисига 2 млн 60 минг сўм жарима қўлланган ҳамда ундан Li 9 ҳайдовчиси фойдасига 798 млн сўм моддий зарар ундириш белгиланган. Li 9 ҳайдовчиси эса суғурта полисини олиб юрмагани учун 206 минг сўм жаримага тортилган.

Суднинг мазкур қарори ижтимоий тармоқларда турли баҳс ва эътирозларни келтириб чиқарди.

Тошкент шаҳар судлари 13 феврал куни берган расмий ахборотга кўра, ЙТҲ бўйича ЖИБ Мирзо Улуғбек туман судининг маъмурий ҳуқуқбузарликка доир қарори апелляция инстанцияси судлов ҳайъатида мазмунан кўриб чиқилган.

«Апелляция инстанциясида тарафларнинг важлари муҳокама қилиниб, маъмурий ҳуқуқбузарликка доир иш бўйича дастлабки суриштирув ишлари тўлиқ ўтказилмаган ва уларни суд процессида бартараф этиш имконияти йўқ, деб топилди», дейилади ахборотда.

Қайд этилишича, якунда биринчи инстанция суди қарорини бекор қилиш, иш материаллари қўшимча суриштирув ҳаракатлари ўтказиш учун тегишли органга юбориш ҳақида қарор қабул қилинган. Суд қароридан норози тараф тафтиш тартибида шикоят қилиш ҳуқуқига эгалиги билдирилган.

Мазкур ЙТҲ Мирзо Улуғбек тумани Мустақиллик шоҳкўчаси 42А-уй қаршисида содир бўлганди, ЙТҲ оқибатида жиддий жароҳат олганлар ва ҳалок бўлганлар йўқ. Фақат Li 9 ҳайдовчисига шифокорлар томонидан биринчи тез тиббий ёрдам кўрсатилган.