Сурхондарёда ўқитувчилардан мажбурий пул йиғиш топшириғини берган “замҳоким” ишдан олинди

Ўқитувчилардан мажбурий пул йиғишга кўрсатма берган Жарқўрғон тумани ҳокими ўринбосари Анвар Ражабов ишдан олинди. Бу ҳақда Сурхондарё вилояти ҳокимлиги ахборот хизмати раҳбари Муродбек Давлатов маълум қилди.

“Жарқўрғон туманидаги 33-сонли умумтаълим мактаби педагог ходимларидан пул маблағлари мажбурий тартибда йиғилаётгани ҳақидаги хабар юзасидан тайинланган хизмат текшируви якунланди.

Текширув вилоят ҳокими назоратида ўтказилиб, ҳолатлар комплекс тарзда ўрганилди, ҳужжатлар таҳлил қилинди ва масъул шахсларнинг тушунтиришлари олинди. Натижада Жарқўрғон тумани ҳокимининг ўринбосари Анвар Ражабов томонидан берилган кўрсатма амалдаги қонунчилик талабларига зид экани, хусусан, ихтиёрийлик тамойили бузилгани аниқланди”, дейилади баёнотда.

Баёнотга кўра, хизмат текшируви хулосасига мувофиқ Анвар Ражабов эгаллаб турган лавозимидан озод этилган ва унинг ҳаракатларига ҳуқуқий баҳо бериш учун текширув материаллари ҳуқуқни муҳофаза қилувчи органларга юборилган.

Kun.uz аввалроқ Жарқўрғон туманидаги 33-умумтаълим мактабида ўқитувчилардан мажбурий пул йиғиш бўйича топшириқ берилгани ҳақида хабар қилганди. “Ҳозир менга ҳоким ўринбосари Анвар Ражабов телефон қилди. Эртага эрталаб соат 9:00 гача 1 млн пулни ҳокимиятга олиб бориб беришимиз керак экан! Дарсим йўқ эди, хабарим йўқ эди деманглар”, дея ёзган мактаб директори Ойсара Узоқова ўз топшириғида.

Жарқўрғон тумани ҳокимлиги ушбу ҳолат бўйича расмий муносабат бериб, Анвар Ражабовга нисбатан интизомий жазо чораси қўлланилгани ҳамда келгусида бу каби қонунбузилиш ҳолатларига йўл қўймаслик, хизмат ваколатларини амалга оширишда қонунийлик ва масъулият тамойилларига қатъий риоя этиш бўйича тушунтириш хати олингани ва расмий огоҳлантириш берилганини маълум қилганди.