Россия Эронга АҚШнинг Яқин Шарқдаги ҳарбий объектлари тўғрисидаги маълумотларни бермоқда – ОАВ

Россия Эронга АҚШнинг Яқин Шарқдаги ҳарбий объектларига зарба бериши учун улар тўғрисидаги маълумотларни тақдим этмоқда, деб ёзади The Washington Post разведка маълумотлари билан таниш бўлган учун нафар манбасига таяниб.

Нашр суҳбатдошларидан бирининг сўзларига кўра, Россия тақдим этган маълумотлар Америка кемалари ва самолётларига оид маълумотларни ўз ичига олади. Россия ёрдамининг бу босқичдаги кўлами охиригача маълум эмас, лекин манба икки мамлакатнинг ушбу соҳадаги ҳамкорлигини «анчагина кенг қамровли» деб атади.

Қайд этилишича, Эроннинг разведка маълумотларини олиш салоҳияти урушнинг биринчи кунида берилган зарбалардан сўнг камайган, Россияда эса хусусан, сунъий йўлдошлар билан бунга имкониятлар етарли.

Карнеги фондининг Россия қуролли кучлари бўйича эксперти Дара Массикотнинг айтишича, Эрон Америка ҳарбий объектларига «жуда аниқ зарба бермоқда» ҳамда қўмондонлик марказлари ва назорат тизимларини йўқ қилиш учун буни «жуда мақсадли» амалга оширмоқда.

Ўз навбатида, Ҳарвард хавфсизлик маркази ходими Никол Граевски 2025 йилда Исроил билан бўлган 12 кунлик ҳарбий низо билан солиштирганда Эрон зарбалари самарадорлиги ҳатто ошганини қайд этди.

АҚШ мудофаа вазирлиги ушбу хабар бўйича изоҳ бермади.

The Washington Post манбалари АҚШ Украинага Россиядаги нишонларга зарба бериш учун маълумотлар тақдим этаётганини эслатиб ўтишди.

«Руслар украинларга кўрсатаётган ёрдамимиздан жуда яхши хабардор, — деди нашр суҳбатдошларидан бири. — Менимча, улар бунга қандайдир тарзда жавоб қайтаришдан жуда хурсанд бўлишган».

АҚШ ва Исроил 28 февралдан буён Эронга зарба бермоқда. Эрон эса Исроилга ва АҚШнинг ФОрс кўрфазидаги иттифоқчи мамлакатларига ракета ва дрон зарбалари йўлламоқда. АҚШнинг ҳарбий базалари Эрон нишонига айланмоқда.

Сунъий йўлдош тасвирларини таҳлил қилган CNN журналистлари Эрон зарбалари натижасида АҚШнинг Иорданияда жойлашган THAAD ракетага қарши мудофаа тизимининг камида битта радари ишдан чиққан деган хулосага келишди. Шунингдек, БААдаги THAAD тизимлари жойлашган иккита ҳарбий объектга ҳам зарбалар берилган.