Хўрмуз бўғози фақат АҚШ, Исроил ва уларнинг иттифоқчилари учун ёпиқ – Эрон ТИВ

Эрон ташқи ишлар вазири Аббос Ароқчи Хўрмуз бўғози очиқлиги, фақат АҚШ, Исроил ва уларнинг иттифоқчиларига тегишли кемалар учун чекловлар мавжудлигини маълум қилди.

"Хўрмуз бўғози орқали кўплаб танкер ва кемалар ўтмоқда, у фақат Америка ва Исроил кема ва танкерлари учун ёпиқ", — деди Ароқчи MS Now телеканалига берган интервюсида.

У бошқа давлатларнинг минтақадаги кемалар хавфсизлигига оид хавотирлари Эрон билан боғлиқ эмаслигини таъкидлади. 

"Аслида Хўрмуз бўғози очиқ. У фақат душманларимизнинг танкер ва кемалари учун ёпиқ. Бизга ҳужум қилаётганлар ва уларнинг иттифоқчилари учун. Қолганлар бемалол ўтишлари мумкин", - деди у.

Аввалроқ Financial Times газетаси Европанинг бир неча мамлакатлари Теҳрон билан ўз кемаларининг Ҳўрмуз бўғози орқали хавфсиз ўтишини кафолатлайдиган келишув тузиш юзасидан дастлабки музокаралар олиб бораётгани ҳақида ёзганди.