“Zamin qurilish”нинг “Rohat” турар-жой мажмуаси масъуллари қамоққа олинди

Тошкент шаҳрининг Яшнобод туманида қурилаётган “Rohat” турар-жой мажмуаси масъулларига нисбатан жиноят иши қўзғатилди. Бу ҳақда Kun.uz’нинг ички ишлар органларидаги манбаси хабар берди.

Унга кўра, қурилиш фирмаси раҳбари ҳамда сотув бўлими бошлиғи қамоққа олинган. Улар жуда кўп миқдорда фирибгарлик жиноятини содир этганликда гумонланмоқда. Жабрланувчилар 200 нафардан ортиқ. Ҳозиргача аниқланган зарар 50 млрд сўмдан ошади.

Kun.uz’да мавжуд ҳужжатларга кўра, “Rohat” турар-жой мажмуаси “Broccoli Plus” МЧЖ томонидан қурилмоқда. 2020 йил март ойида давлат рўйхатидан ўтказилган МЧЖ раҳбари Шоҳбозмирзо Ҳожиев, таъсисчилари эса Садулло Насуллоев ҳамда Аслбек Каримов ҳисобланади. 

Фуқароларга сотилган “Rohat” турар-жой мажмуаси аввалроқ қурилиш фирмасининг банк олдидаги 5,5 млн доллар кредит қарздорлигини сўндириш учун суд қарорига асосан аукционга чиқарилгани аниқланганди. Эндиликда мазкур турар жой мажмуасидан улуш киритиш асосида хонадон сотиб олган юзлаб харидор “дом” аукционда сотилса, янги эга уйларни бошқа харидорларга сотиб юборишидан хавотирда.