Ўзбекистон 2026 йилда сунъий йўлдош интернетини ишга туширишга тайёрланмоқда

2026 йилда Ўзбекистонда сунъий йўлдош интернетини, шу жумладан Starlink технологияси асосидаги тармоқни синов тариқасида ишга тушириш режалаштирилган. Бу ҳақда 27 март куни Қозоғистоннинг Чимкент шаҳрида бўлиб ўтаётган Digital Qazaqstan 2026 халқаро форумида бош вазир Абдулла Арипов маълум қилди, деб ёзди Digital Business.

Абдулла Ариповнинг таъкидлашича, мамлакатда кенг полосали интернет қамрови аллақачон 41 фоиздан 99,5 фоизга етган, бироқ ҳозир асосий эътибор оддий оптик толали ва уяли алоқа тармоқлари ҳали ҳам ёмон ишлаётган ёки умуман йўқ бўлган чекка ва олис аҳоли пунктларига қаратилмоқда.

Синов тариқасида ишга тушириш рақамли инфратузилмадаги бўшлиқларни бартараф этиш воситаси сифатида, шу жумладан алоқа ҳали ҳам заиф бўлиб қолаётган қишлоқлар ва чекка ҳудудлар учун мўлжалланган.

Агар синов муваффақиятли чиқса, Ўзбекистоннинг чекка ҳудудлари аҳолиси ривожланган ерусти инфратузилмаси бўлмаса ҳам, нисбатан барқарор сунъий йўлдош интернетига эга бўлиши мумкин. Бу йирик шаҳарлар ва чекка ҳудудлар ўртасидаги рақамли тафовутни камайтириши, масофавий иш, онлайн таълим, телетиббиёт ва рақамли давлат хизматларини янада қулайлаштириши керак.

Starlink - дунёнинг исталган нуқтасидан юқори тезликдаги кенг полосали интернетга уланишни таъминлаш учун мўлжалланган глобал сунъий йўлдош алоқа тизими. Тармоқ дунёнинг 100 дан ортиқ мамлакатларида, жумладан, Шимолий ва Жанубий Америка, Европанинг аксарият мамлакатлари, Австралия, Янги Зеландия, Африканинг бир қисми ва Осиёда фаолият юритади.

Марказий Осиёда Starlink интернети ишлатилган биринчи давлат 2025 йилда Қозоғистон бўлди. 2026 йил февралда Тожикистон ҳам уни ишга туширди.