Андижондаги яширин дори цехларидан 10 млрд сўмлик қалбаки дорилар мусодара қилинди

Андижон вилояти божхона бошқармаси Контрабандага қарши курашиш бўлими, Давлат хавфсизлик хизмати, Ички ишлар ва Миллий гвардия ходимлари билан ҳамкорликда сифати кафолатланмаган дори воситаларини ишлаб чиқариш ва муомалага киритишнинг олдини олишга қаратилган тезкор қидирув тадбирлари ўтказилди.

Андижон ва Асака шаҳарлари ҳамда Асака туманида ўтказилган тезкор тадбирларда шубҳа остига олинган 3 нафар шахснинг яшаш хонадонларида дори воситаларини ишлаб чиқаришга мўлжалланган яширин лаборатория ва цехлар ташкил қилингани аниқланди.

Қўлбола тарзда дори воситаларини ишлаб чиқаришга мўлжалланган яширин цехлардан қиймати 1 млрд 250 млн сўмлик ускуналар, муҳрлар, 214 минг дона бўш флакон ва идишлар, турли этикетка ва йўриқномалар, уларни қадоқлашга хизмат қилувчи анжомлар ашёвий далил сифатида олинди.

Шунингдек, 163 хил турдаги 286 минг 676 дона сифати кафолатланмаган дори воситалари олиб қўйилди.

“Тивортин”, “Лайботен”, “Ревартон”, “Дипроспан”, “Рияболел” “Цефазолин”, “Стрептомицин”, “Ампициллин” каби қўлбола дори воситаларининг асл нусхалари қиймати фармацевтика бозорида ўртача 10 млрд. сўмни ташкил қилади.