Навоийда онлайн қиморга ютқазган йигит қарздан чиқиш учун Россия армиясига ёлланишга қарор қилди

Навоийда Россия армиясига ёлланиб, ушбу давлатга кетмоқчи бўлган шахс тўхтатиб қолинди. Kun.uz суд ҳукми билан танишди.

Талабаликдаги хато

Суд ҳужжатида келтирилишича, Кармана туманида яшовчи, 2001 йилда туғилган Ж.З. 2019 йилда Тошкентдаги олийгоҳларнинг бирига ўқишга қабул қилинган ва 2023 йилда институтни тамомлаган. У талабалик даврида Тошкент шаҳрида танишининг Cobalt машинасини бошқариб, ЙТҲ содир этган. Йигитнинг кейинги хатолари мана шу нуқтадан бошланган.

Ж.З. машинани таъмирлаш учун танишларидан 20 млн сўм қарз олган. Сўнгра танишлари пулни сўрай бошлагач, фоизга пул берувчи шахсдан 20 млн сўм олган. Навбатдаги қадамда у ушбу маблағнинг фоизини узиш мақсадида банкдан 9,8 млн сўм кредит расмийлаштирган. Шу тариқа, у қарз ботқоғига ботишни бошлаган.

“Ўз жонимга қасд қилмоқчи бўлдим”

Ж.З. институтни тамомлаб, Тошкент шаҳридан кетаётган вақтида танишларидан 35 млн сўм атрофида қарзи бўлган. У 2024 йил май ойида Навоийда тадбиркор танишидан 5 минг доллар қарз олган. Ушбу пулнинг 35 млн сўмини аввалги қарзлари учун берган, қолганини эса онлайн қиморга тиккан. У бу орқали кўпроқ пул ишлаб олиб, тадбиркор танишидан қарзини узишни мақсад қилганди. Бироқ бундай бўлмади, тиккан пулини ютқазиб қўйган. Шу тариқа, 35 млн сўм қарз 5 минг долларга айланган.

Сўнгра аммасининг ўғлидан 90 млн сўм қарз олган. Ушбу пулнинг ҳам 50 млн сўмини онлайн қиморга тикиб, ютқазган. Аммо буни онаси билиб қолиб, тилла тақинчоқларини сотиб ҳамда кредит олиб, қарзга олинган 90 млн сўм пулни узишган.

“Бироқ тадбиркор танишимнинг пулини қайтара олмадим. 2024 йил октябр ойи бошида ишлаб пул топиш ва қарзимни узиш мақсадида Россиянинг Мосвка шаҳрига кетдим. У ерда ҳайдовчи бўлиб ишладим. 2025 йил 20 январда Ўзбекистонга қайтдим. Ишлаб келган пулимдан минг долларини тадбиркор танишимга қайтардим”, деган судланувчи ўз кўрсатмасида.

Шундан сўнг у Самарқанд шаҳрида жойлашган дори маҳсулотлари тарқатувчи компанияда иш бошлаган. Аммо дорихоналарнинг биридан 24 млн сўм қарз олиб, яна 1Xbet’га тикиб юборган. Ютқазиб қўйган ушбу маблағни ҳам қариндошларидан қарз кўтариб, узган.

Шу тариқа, Ж.З.нинг атрофдагилардан қарзи яна 90 млн сўмга яқинлашган.

“Ушбу пулларни қандай қайтаришни ўйлай бошладим, лекин бирор йўлини тополмадим. Бир марта ўз жонимга қасд қилишга ҳам қарор қилдим, турмуш ўртоғим кўриб қолди”, деган у кўрсатмасида.

Урушга боришга розилик

Ж.З. 2025 йил июл ойида қарзларидан қутулиш мақсадида ижтимоий тармоқлар орқали Россиядан иш излай бошлаган. Иш таклиф қилинган ҳар 4-5 эълондан бири Украинага қарши урушда қатнашиш билан боғлиқ эди. Бунинг учун катта миқдорда пул ваъда қилинганди. Қарзлардан ўзини боши берк кўчага кириб қолгандай ҳис қилаётган йигит учун бу нажот йўли бўлиб кўринганди.

“Эълонлардан бирида келтирилган профилга урушда иштирок этсам қанча пул берилишини сўраб, WhatsApp орқали хабар ёздим. Менга бир йил давомида умумий 5 млн рубл берилишини маълум қилди. Шундан сўнг ушбу профил эгаси билан мунтазам равишда гаплашиб турдим. У Россия Қуролли кучларига кирувчи муддатли харбий хизматчиларни тўплаш билан шуғулланувчи шахс экан”, деган Ж.З.

Судланувчи ушбу шахс билан Россия армиясига ёлланиб, Украинага қарши урушда иштирок этиш учун қандай ҳужжатлар кераклиги, нима олиб бориши лозимлиги, қанча пул берилиши, бу қилмиши учун Ўзбекистонда жиноий жазога тортилса Россия Қуролли кучлари қандай ёрдам бера олиши тўғрисида суҳбатлар олиб борган. Профил эгаси эса уни Россияга чақирган, урушда қатнашса ушбу давлат фуқаролигини ваъда қилган. Ж.З. ушбу таклифга розилик билдирган. Шу тариқа томонлар келишган.

Келишувга кўра, Ж.З. ўзи авиачипта олиб, Москва шаҳрига бориши лозим эди. Аэропортда уни кутиб олиш ваъда қилинган. Сўнгра ҳарбий полигонда бир ойлик тайёргарликдан ўтиб, Украинага қарши урушда қатнашиши керак бўлган.

Яшириб қўйилган паспорт

Судда Ж.З.нинг онаси гувоҳ сифатида сўроқ қилинган. У ўғли Россияга кетиб қолишининг олдини олиш учун ўзи ИИБга ариза билан мурожаат қилганини айтган.

“Келиним ўғлим Украинага қарши жанговор ҳаракатларда иштирок этиш ниятида телефони орқали Россия Қуролли кучларида ишловчи шахслар билан гаплашиб, Россияга кетиш учун билет сотиб олганини айтди. Шундан сўнг ўғлим Россияга кетолмаслиги учун унинг хорижга чиқиш паспортини яшириб қўйдим. Ўғлим паспортини тополмасдан Россияга кетиш авиачиптаси вақтини 11 июл кечдан 12 июл соат 5:55 га ўзгартирди. Аммо паспортини тополмасдан, ўзига боғлиқ бўлмаган ҳолда самолётдан қолиб кетди. Ўғлимнинг ҳаракатларидан шубҳаланиб, бу оғир оқибатларга олиб келиши мумкинлигини сездим. Шу сабабли Кармана туман ИИБга бориб, ўғлим Россияга чиқиб кетишининг олдини олишда улардан ёрдам сўрадим”, деган она ўз кўрсатмасида.

Жазо

ЖИБ Кармана туман судининг 2026 йил 4 мартдаги ҳукми билан Ж.З. Жиноят кодексининг 25,154-моддаси (ёлланишга суиқасд қилиш) 1-қисмида назарда тутилган жиноятни содир этишда айбли деб топилган. Унга Жиноят кодексининг 57-моддасини қўллаган ҳолда 4 йил муддатга озодликни чеклаш жазоси тайинланган. Унга назорат қилувчи органнинг розилигисиз яшаш жойини ўзгартирмаслик, зарур вақтдан ташқари қўшимча интернетдан фойдаланмаслик, Навоий вилояти ҳудудини тарк этмаслик каби қўшимча чекловлар юклатилган.