Абдуқодир Ҳусанов «Манчестер Сити»да учинчи марта ойининг энг яхши футболчиси бўлди

Ҳимоячи Абдуқодир Ҳусанов «Манчестер Сити»нинг март ойи якунлари бўйича энг яхши футболчиси деб топилди.

Ўзбекистон миллий жамоасининг 22 ёшли футболчиси мухлислар орасида ўтказилган сўровномада яримҳимоячи Родри ва вингер Жереми Докуни ортда қолдирди.

Ҳусанов учинчи марта шундай совринни қўлга киритмоқда - у 2025 йилнинг феврал ва шу йилнинг январ ойида ҳам жамоанинг энг яхши футболчиси деб топилган эди.

Ўтган ойда Ҳусанов барча турнирларда 6 та ўйинда майдонга тушди, шундан 5 тасини асосий таркибда бошлади. Шунингдек, Ҳусанов Англия Лига Кубогида зафар қучди. 22 март куни Абдуқодир финалда «Арсенал»га қарши ўйинда (2:0) тўлиқ 90 дақиқа ўйнаб, Англиядаги илк совринини қўлга киритди.

Эслатиб ўтамиз, Абдуқодир «шаҳарликлар» сафига 2025 йил январида Франциянинг «Ланс» клубидан кўчиб ўтган ва айни пайтда Пеп Гвардиола жамоасининг асосий ҳимоячиларидан бирига айланиб улгурди.