Бешқўрғон бозорида йирик ёнғин – воқеа жойидан репортаж

Олов савдо дўконларидан ташқари кўплаб автомобилларга ҳам тиклаб бўлмас даражада талафот етказгани маълум бўлди.

Kun.uz мухбири ҳодиса жойида бўлиб, репортаж тайёрлади.

Тошкент шаҳрида халқ орасида Ипподром номи билан машҳур бўлган ҳудуддаги Бешқўрғон бозорида 5 апрел куни ёнғин содир бўлди. Kun.uz мухбири ҳодиса жойида бўлиб, репортаж тайёрлади.

“Олов жуда кучли бўлди, жуда ёнди. Машиналар ҳам ёнди. Жуда кўп одамлар зарарга учради. Кўп машиналар қолиб кетди. Иложи борича дўконларни чиқардик. Олов кучайиб кетди, ўт ўчирувчилар келди, суви ҳам етмай қолди. Мана шу йўллар “пробка”лиги сабабли. Ёнғин омбордан келиб чиқди, биринчи марта бунақа оловни кўрдик.

Машиналарнинг ойнасини синдириб бўлса ҳам ёрдам қилдик шу инсонларга. Қолгани қолди”, — дейди ҳодиса гувоҳига айланган фуқаро.

“Қўшни бинода бизнинг дўкон бор. Тадбиркорлик билан шуғулланаман ўзим. Бу дўконимизда, мен ўзим бугун дам олишда эдим. Болалар телефон қилиб, ёнғин бўляпти деганда, етиб келдим. Келсам, ўзи жуда кўпчилик шу ерда юрган, ўтиб қайтган, кимдир эшитган, бозордаги таниш-билишлар чиқиб, ҳамма кимдагадир ёрдам бериб, бир-бирига, барибир инсонийлик хислати бор-да бизда, ёрдам бериб, ҳамма нарсани имкон қадар максимал олиб чиқишга ҳаракат қилди ҳамма. Аллоҳга шукур, бизнинг бинога зарар етмади”, дейди яна бир гувоҳ.

Фавқулодда вазиятлар вазирлиги ахборот хизмати ёнғин қамраб олган ҳудуд тахминан 8000 квадрат метрни ташкил этганини маълум қилди.

“Ёнғин келиб чиқишининг дастлабки тахмини йўқ. Ҳозирда ёнғин суриштирув ишлари олиб борилмоқда. Фавқулодда вазиятлар вазирлиги лабораторияси у ерда иш олиб бормоқда ҳозирда. Ёнғиннинг қўшимча маълумоти берилади дастлабки тахмин бўлиши билан. Бу ерда кундузи айнан ёнғин хабари келиб тушганда, биринчи хабарда бизларга дўкон ёнаётганлиги тўғрисида хабар келиб тушди. Қутқарув экипажлари айтилган манзилга етиб келганда, ёнғиннинг майдони катталиги ва айнан бозор ҳудудидаги бир нечта дўконлар ёнаётгани аниқланди. Тан жароҳати олган фуқаролар йўқ айтилган манзилда. Фақатгина, ҳозирда мана, бир фуқаролар томонидан шунақа хабар келяптики, ёнғин жойидаги тутунни кўриб, мана ҳозирда кўриб турганимиздек, ҳали ҳам ёнғин содир бўляпти, деган шубҳа уйғоняпти. Хавотирга ўрин йўқ. Тутун чиқишининг сабаби, бу ерда кийим-кечак дўконлари ёнган. Кийим-кечак бўлган дўконларда ва мато ёнганда ўзидан тутун чиқади, то тўлиқ ёнғиннинг ичидаги матоларни ичидан титиб олиб ташламагунча. Ҳозирда худди шу ишлар олиб борилмоқда: кийим-кечакларни тўлиқ ташқарига чиқариш, сувлаб, сув билан бўктириш ишлари олиб борилмоқда. Қизғиш чироқ эса у ёнғин оловининг чироғи эмас. Бу проекторлар чироғи. Қутқарувчилар ишлаш учун қўшимча ёритиш учун шароит яратиб бериляпти. Ёнғин 8000 квадрат метрда, ёнғиндан зарар кўрган бозор ҳудуди. Ҳозирда ёнғин таҳлил ишлари олиб борилмоқда. Жорий йилнинг ҳозирги кунигача Тошкент шаҳрида барча бозорларда тегишли тартибда профилактик кўриклар, ҳар битта бозорда текширувлар олиб борилган ва тегишли тартибда камчиликлар юзасидан бозор раҳбариятига берилган. Чунки аввал хабар берганимдек, мен шахсан ўзим Тошкент шаҳридаги бир нечта бозорларда текширувлар ўтказганман. Аниқланган текширувда камчилик бўлган ва бир нечта бозорлар — фуқароларнинг хабари бор, ижтимоий тармоқларда кенг тарқалган — иш фаолияти вақтинчалик тўхтатилган. Ҳозирда айнан бу бозор бўйича ёнғин содир бўлгани сабаби аниқланмоқда. Бунинг бир нечта сабаблари бўлиши мумкин. Энди тахминга таяна олмаймиз. Ҳозирда аниқ сабаби аниқланиши билан, албатта, ахборот берамиз. Ичкарида ҳозирда тўрт-бешта автомобил, енгил автомобиллар қолиб кетган. У ерда ҳам қолиб кетиш сабаби — бозорнинг тор йўлакида айрим фуқаролар ўз автомобилини ташлаб кетади. Бу олдиндан курашиб келинади, айнан бозор раҳбарияти томонидан, биз томондан, яъни йўлакларни қутқарув техникаларига тўсиб қўймаслик бўйича. Ҳозир мана гувоҳ бўлиши мумкин, айнан йўлакларни тўсиб қўйиш нимага олиб келади. Ҳам бозор ёниб кетади, ҳам қутқарув техникаси кира олмайди ва шу билан бир қаторда тўрт-бешта автомобил, енгил автомобиллар ёниб кетган. Ҳар битта дўкон эгалари ўз товар-моддий бойлигини ташқарига олиб чиқиш чоралари кўрилди. Кўпи ёниб кетди ва кўпи олиб чиқишга эришилди. Фақатгина ҳозир бозор ҳудуди ўраб олинган. Чунки у бозор ҳудудида кўп товар-моддий бойликлар бўлганлиги учун Ички ишлар вазирлиги ва тегишли органлар томонидан ўраб олинган. Тутун қуюқ бўлди. Тутунда қутқарувчиларимизнинг қийинчилигига қарамасдан, айнан ёнғиннинг ўчоғига кириш ва тутуннинг айнан ичида ишлашда қийинчилик бўлди, чунки кўриш мутлақо йўқ эди. Бозор ҳудуди ёпиқ бўлганлиги учун тепа томонлари, атрофлари тутун қуюқ бўлган. Лекин қийинчиликни умуман олганда қийинчилик демаймиз, чунки қутқарувчилар ҳар доим бу нарса билан дуч келади. Бу уларнинг вазифаси ҳисобланади”.

ФВВ ҳозирча ёнғин етказган зарар миқдори ҳисобланаётгани, жароҳатланганлар ва вафот этганлар йўқлигини маълум қилди.