Пентагон Кубага қарши ҳарбий операцияга тайёргарликни бошлади – ОАВ

Президент Доналд Трамп маъмурияти Пентагонга Кубада эҳтимолий ҳарбий операцияга тайёргарликни кучайтиришни яширинча топширди. Бу ҳақда USA Today Оқ уй кўрсатмалари билан таниш бўлган иккита аноним манбага таяниб хабар берди.

Нашрнинг ёзишича, Пентагон ва АҚШ Жанубий қўмондонлиги президентнинг ҳарбий операция тўғрисидаги эҳтимолий буйруғини кутиб, фавқулодда вазиятларни режалаштиришни кучайтириш бўйича кўрсатма олган.

Вашингтон ва Ҳабана ўртасидаги кескинлик 2026 йил январь ойида АҚШ Кубага нефть етказиб беришга қатъий чекловлар киритганидан кейин кескин ошди. Бу чора «максимал босим» кампаниясининг бир қисми бўлиб, унинг мақсади Куба раҳбариятини кенг кўламли сиёсий ислоҳотлар ўтказишга ва аслида режим ўзгаришига эришишга мажбур қилиш эди.

Январь ойида АҚШ ҳарбийларининг Николас Мадурони Венесуэладан олиб чиқиш бўйича ўтказган махфий операцияси вазиятни янада мураккаблаштирди, оқибатда собиқ президентни қўриқлаётган 32 нафар кубалик ҳарбий ҳалок бўлди.

Президент Трампнинг ўзи Кубани нишонга олганини бир неча бор маълум қилган.

«Биз бу масалани ҳал қилганимиздан сўнг, Кубага киришимиз мумкин», деди Трамп 13 апрель куни Эронга қарши давом этаётган ҳаракатларни назарда тутиб.

Куба президенти Мигел Диас-Канел орол мудофаага тайёрлигини айтди: «Биз жанг қиламиз, ўзимизни ҳимоя қиламиз ва агар жангда ҳалок бўлсак, ватан учун ўлиш - бу яшаш демакдир».

Ҳозирча гап фақат режаларни тайёрлаш ҳақида кетмоқда, босқин ҳақида қабул қилинган қарор ҳақида эмас. Шу билан бирга, парда ортидаги музокаралар давом этмоқда: Куба АҚШга портлар, энергетика ва туризм бўйича иқтисодий ҳамкорликни таклиф қиляпти, бироқ Вашингтон сиёсий ўзгаришларни талаб қилмоқда.

Баъзи мутахассисларнинг таъкидлашича, Куба ўнлаб йиллар давомида коммунистик бошқарувдан сўнг «сўнгги нафасини олмоқда» ва Трамп маъмурияти бу ишни якунлаш ниятида экани аниқ.