Россия ва Озарбойжон AZAL самолёти ҳалокати оқибатлари «ҳал этилганини» эълон қилди

Икки давлат Ташқи ишлар вазирлигининг қўшма баёнотида айтилишича, самолёт «Россия ҳудудида ҳаво ҳужумидан мудофаа тизимининг тасодифий ҳаракати оқибатида» ҳалокатга учраган. Шунингдек, товон пули масаласи ҳам ҳал этилган.

Фото: Дастан Шанай

Озарбойжон ва Россия Ташқи ишлар вазирликлари қўшма баёнотда 2024 йил декабрь ойида юз берган Azerbaijan Airlines (AZAL) йўловчи самолёти ҳалокатининг «оқибатлари тегишли равишда ҳал этилганини» маълум қилди.

Томонлар, жумладан, авиаҳалокат бўйича товон пули тўлаш масаласи ҳам ҳал этилганини маълум қилди. Бироқ, унинг миқдори ва бошқа тафсилотлар келтирилмади.

«Ташланган қадамлар иттифоқчилик ҳамкорлиги доирасида ўзаро манфаатли ҳамкорликни янада ривожлантиришга интилишни тасдиқлайди», дейилади Россия ва Озарбойжон вазирликлари баёнотида.

Ҳужжатда айтилишича, самолёт «Россия ҳудудида ҳаво ҳужумидан мудофаа тизимининг тасодифий ҳаракати оқибатида» ҳалокатга учраган.

AZAL авиакомпаниясининг Бокудан Грознийга учаётган Embraer E190 самолёти 2024 йил 25 декабрь куни Қозоғистоннинг Оқтов шаҳрида ҳалокатга учради. Ҳодиса оқибатида 38 киши ҳалок бўлди, 29 киши омон қолди.

Самолёт Украина дронларининг Кавказ минтақаларига ҳужуми пайтида Грознийга қўнолмаган ва Каспий денгизи орқали Қозоғистонга парвоз қилган эди. Ҳалокатдан сўнг, унинг фюзелажида кўплаб ўқ излари топилди.

Ҳодиса Москва ва Боку муносабатларида инқирозга сабаб бўлди. Шу жумладан, Озарбойжон Россиядан авария учун жавобгарликни тан олишни талаб қилгани учун ҳам.

Владимир Путин фақат 2025 йил октябрь ойида AZAL самолёти Россиянинг ҳаво ҳужумидан мудофаа тизими томонидан зарбага учраганини тан олди. Озарбойжон президенти Илҳом Алиев билан учрашувда у ҳалокатга Россия ҳаво мудофаасининг «техник носозлиги» сабаб бўлганини, отилган иккита ракета эса «самолётга бевосита тегмаганини», балки ўн метр нарида портлаганини айтди.