Хитой Meta’нинг Manus стартапини сотиб олиш бўйича 2 миллиард долларлик битимини тўхтатди

Хитой тараққиёт ва ислоҳотлар давлат қўмитаси (NDRC) Manus сунъий интеллект стартапини Meta компаниясига сотиш бўйича келишувни бекор қилишни талаб этди. Бу Пекиннинг сўнгги пайтлардаги технология соҳасига энг жиддий аралашувларидан биридир, деб ёзди CNN.

Meta Manus’ни 2 миллиард долларга сотиб олишни режалаштирган эди. Дастлаб Хитойда ташкил этилган ва кейинчалик штаб-квартирасини Сингапурга кўчирган стартап ўзининг илғор СИ агентлари - фойдаланувчи номидан мураккаб вазифаларни мустақил равишда бажара оладиган автоном тизимлари билан танилган.

Хитой ҳукумати 2026 йил январида тергов бошлаган ва компания таъсисчиларига мамлакатни тарк этишни тақиқлаган эди. Пекиннинг фикрича, Manus’нинг сотилиши АҚШга муҳим технологияларнинг сизиб чиқиши хавфини туғдиради.

Manus жамоасининг бир қисми аллақачон Meta тузилмаларига интеграциялашган бўлса-да, битим энди бутунлай бекор қилиниши керак.

Meta ҳозирча ҳолатга изоҳ бермади. Бу воқеа Доналд Трамп ва Си Жинпингнинг кутилаётган учрашувидан бир неча кун олдин содир бўлмоқда, бу эса АҚШ ва Хитой ўртасидаги технологик қарама-қаршиликнинг чуқурлигини кўрсатади.