Оҳангарондаги 14 ёшли қиз билан боғлиқ ҳолат Болалар омбудсмани назоратига олинди

Тошкент вилоятининг Оҳангарон туманида вояга етмаган қиз билан боғлиқ ҳолат Болалар омбудсмани Сурайё Раҳмонова назоратига олинди.

Аввалроқ, ижтимоий тармоқларда 14 ёшли қизга нисбатан ППХ ходими ноқонуний ҳаракатлар содир этгани ҳақида хабарлар тарқалганди. Маълум қилинишича, ҳодиса бўйича ички ишлар органлари томонидан хизмат текшируви тайинланган, Оҳангарон шаҳри прокуратураси эса терговга қадар текширув ҳаракатларини олиб бормоқда. Болалар омбудсмани вояга етмаган шахснинг манфаатлари юзасидан кузатувни давом эттириши ва қўшимча маълумот берилиши билдирилган.

Ушбу ҳолат ҳақидаги хабар ижтимоий тармоқларда тарқалган эди. Унда айтилишича, ППХ ходими 14 ёшли қиз ва унинг дугонасини автомобилга миндириб, чекка ҳудудга олиб борган ҳамда тегажоғлик қилган.

Шундан сўнг Ички ишлар вазирлиги Шахсий хавфсизлик бўлинмаси прокуратура билан ҳамкорликда текширув бошлаганини маълум қилди. Дастлабки баёнотда ППХ ходими хизмат вазифасидан четлатилгани, ҳолат тасдиқланса, унга нисбатан қатъий ҳуқуқий чора кўрилиши айтилди.

Кейинроқ, Тошкент вилояти ИИББ ҳолат юзасидан бошқа баёнот билан чиқиб, ижтимоий тармоқларда тарқалган иддаолар ҳақиқатга тўғри келмаслигини маълум қилди. Таъкидланишича, ҳолат 27 апрел куни тунда содир бўлган. Оҳангарон шаҳар ИИБ ППХ ходимига таниши 22 ёшли аёл қўнғироқ қилиб, маслаҳат олиш заруратини айтиб чақирган. ППХ ходими машинада етиб борган вақтида аёл ва унинг 14 ёшли қиз таниши машинага ўтирган. Шу вақтда 18 ёшли йигит 4 нафар таниши билан келиб, ходимни ҳақоратлаб, жанжал кўтарган. ИИББ ҳолат вояга етмаган қиз иштирокида бўлгани сабабли, тўлиқ тафсилотлар ҳозирча очиқланмаслигини маълум қилди. Шунингдек, иш якунига кўра ёлғон ахборот тарқатган шахсларга нисбатан чора кўрилишини қўшимча қилди.