Давлат чегарасидаги ноқонуний туннел учун жиноий жавобгарлик жорий этилади

Сўнгги пайтларда давлат чегарасида яширин туннел қазиб, товар ва маҳсулотларни ташиш, ноқонуний олиб ўтиш ҳолатлари кўпайиб бормоқда. Жумладан, 2016-2025 йиллар оралиғида 12 та ана шундай тунел аниқланган. Масалан, Фарғона ва Андижон вилоятларида туннеллар орқали 30 миллиард сўмдан ортиқ товар яширинча олиб кирилган. Бу ҳақда Қонунчилик палатасида маълумот берилди.

Қайд қилинишича, энди бу каби ҳолатлар учун жавобгарлик кучайтирилади.

Қонунчилик палатаси мажлисида кўриб чиқилган «Ўзбекистон Республикасининг Жиноят ва Жиноят-процессуал кодексларига давлат чегарасини қўриқлаш ҳамда ҳимоя қилишни янада кучайтиришга қаратилган ўзгартириш ва қўшимчалар киритиш тўғрисида»ги қонун лойиҳаси айни масалаларга қаратилган. 

Лойиҳага кўра, давлат чегараси орқали ер остида ноқонуний қурилган иншоот, туннел ёки бошқа инфратузилмадан фойдаланган ҳолда божхона тўғрисидаги қонунчиликни бузиш оғирлаштирувчи ҳолат сифатида белгиланмоқда. Давлат чегараси орқали ер остида ноқонуний қурилган иншоот ва туннелдан фойдаланган ҳолда қонунга хилоф равишда чет элга чиқиш, Ўзбекистонга кириш ёки давлат чегарасидан ўтиш учун ҳам жавобгарлик кучайтирилмоқда.

Қонун лойиҳасида давлат чегараси орқали ер остида ноқонуний иншоот ва туннел қуриш, инфратузилма барпо этиш, улардан фойдаланиш ҳамда мазкур фаолиятни молиялаштириш учун ҳам алоҳида жиноий жавобгарлик таклиф этилган.

Шунингдек, кимда-ким чегарадаги ноқонуний туннел ҳақида ўз ихтиёри билан хабар қилса ёки жиноятни очишга ёрдам берса, жиноий жавобгарликдан озод қилиниши белгиланяпти. 

Қонун лойиҳаси депутатлар томонидан қабул қилинди.