Xon Saroy’нинг “Bahor Residence” турар жой мажмуаси бўйича жиноят иши судда кўрилмоқда. 6 киши қамоқда

Xon Saroy’нинг “Bahor Residence” турар жой мажмуасини қураётган МЧЖ мансабдорлари ва бошқаларга нисбатан жиноят иши қўзғатилиб, Бош прокуратуранинг Ўта оғир жиноятларни тергов қилиш бошқармаси томонидан дастлабки тергов ҳаракатлари олиб борилгани маълум бўлди. Иш айни пайтда жиноят ишлари бўйича Миробод туман судида кўрилмоқда.

Суд мажлислари жадвалига кўра, судланувчилар рўйхатида 6 кишининг исми келтирилган. Улар орасида “Bahor Residence” МЧЖ таъсисчиси (12,50 фоиз улуш) ва раҳбари 39 ёшли Аҳмедов Хуршид Жўрабоевич ҳам бор.

“Bahor Residence” МЧЖ Xon Saroy’нинг “Bahor Residence” лойиҳаси қурувчиси ҳисобланади. Инвесторлар билан тузилган шартномаларда “Xonsaroy Group” МЧЖ “Bahor Residence” МЧЖнинг қонуний тижорий вакили сифатида кўрсатилган.

Хуршид Аҳмедов Жиноят кодексининг қуйидаги моддаларида назарда тутилган жиноятларни содир қилишда айбланмоқда:

• 168-моддаси 4-қисми “а” банди – жуда кўп миқдорда фирибгарлик;
• 192-11-моддаси 2-қисми “а” банди – нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш;  
• 205-моддаси 2-қисми “а” банди – ҳокимият ёки мансаб ваколатини суиистеъмол қилиш;
• 209-моддаси 2-қисми “а” банди – мансаб сохтакорлиги;
• 243-моддаси – жиноий фаолиятдан олинган даромадларни легаллаштириш.

Шунингдек, иш доирасида Аҳмаджонов Анвар Эркин ўғли, Азимов Ғулом Воҳиджонович, Шаробиддинов Шаҳриддин Шаробиддин ўғли, Хўжақулов Хуршид Тўрахонович, Худойназаров Азиз Олимжонович суд қилинмоқда. Жиноят ишида 70 киши жабрланувчи сифатида келтирилган.

2025 йил ноябр ойида ижтимоий тармоқларда Xon Saroy компаниясининг қурилиш лойиҳаларидан бир нечтасига нисбатан тафтиш бошлангани ҳақида хабарлар тарқалганди. Kun.uz суҳбатлашган компания мижозлари терговни Бош прокуратуранинг Ўта оғир жиноятларни тергов қилиш бошқармаси олиб бораётгани ҳақида гапирганди. Бош прокуратура матбуот хизмати Kun.uz’нинг сўровларига жавоб бермаган эди. 

Kun.uz вазият ҳақида изоҳ сўраб, 2025 йил 27 ноябр куни Xon Saroy компаниясига расмий сўров ҳам юборган. Аммо ушбу хат жавобсиз қолдирилган.

Суд органларидаги манбанинг тасдиқлашича, судланаётганларнинг барчаси эҳтиёт чораси сифатида қамоққа олинган.

Kun.uz ўрганган фирмага алоқадор ҳужжатга кўра, Тошкент шаҳар прокурорининг аризаси бўйича Тошкент туманлараро маъмурий судида “Bahor Residence” турар жой мажмуасига нисбатан берилган қурилишга оид ҳужжатларни ҳақиқий эмас деб топиш юзасидан иш мавжуд. Прокурор аризасида суддан Яшнобод тумани, Ёш авлод маҳалласи, Уйсозлар 2-тор кўчаси, 39-уй (“Bahor Residence” ТЖМ қурилаётган) манзилидаги кўчмас мулкни қайта ихтисослаштириш ва реконструкция қилиш Тошкент шаҳар ҳудудий архитектура-шаҳарсозлик кенгаш йиғилишининг лойиҳа-смета ҳужжатларини келишиш бўйича 2024 йил 6 ноябрдаги хулосани ҳақиқий эмас деб топиш сўралган.

Маълумот учун, Xon Saroy компанияси Тошкентда ўнлаб турар жой мажмуаларини қуриб битирган. Компания турар жой мажмуаларини ваъда қилинган муддатларда фойдаланишга топшириши билан мижозлари ишончини қозонганди.