“Ривожланган капитал бозорисиз турмуш даражасини яхшилай олмаймиз” - Иқтисодиёт вазирлиги

Миллий инвестиция жамғармаси илк бор оммавий таклиф чиқараркан, энди оддий одамлар ҳам давлат фонди акциядори бўлиши мумкин. Биз ривожланган капитал бозорларисиз барқарор иқтисодий ўсишга ва турмуш даражасини яхшилашга эришиб бўлмаслигига қатъий ишонамиз, дейди Ўзбекистон иқтисодиёт ва молия вазири ўринбосари ОАВ билан матбуот анжуманида.

Жамғарманинг эгаси давлат эди, энди акцияларнинг бир қисмига оддий одамлар ҳамда инвесторлар эгалик қилиши мумкин. Бу билан янги лойиҳалар қилиш, бизнесни кенгайтириш, қарзларни камайтириш имкони пайдо бўлиши мумкин, қўшимча инвестициялар жалб этиш учун маблағ ҳам олинади.

Бу аслида мамлакатнинг келажагига инвестиция, дейди Templeton Asset Management бош ижрочи директори Манраж Сеҳон 20 май куни матбуот вакиллари билан учрашувда.

“Акцияларни бирламчи оммавий жойлаштиришга бўлган кучли глобал қизиқиш 2,7 миллиард доллардан ортиқ талабни келтириб чиқарди ва таклифдан тўрт баравар кўп бўлди. Ушбу IPO Ўзбекистон фуқароларига ўз мамлакатлари келажагига тўғридан-тўғри сармоя киритиш имконини берди”, - дейди Манраж Сеҳон.

Анжуманда тақдимот қилган Мариус Данга кўра, IPO’ни чиқариш учун тайёргарлик 1 йил давом этган. 27 та давлатдан 147 нафар инвесторлар билан учрашиб, уларга маълумот беришга тўғри келди, дейди у.

-Ўзбекистонда капитал бозори ҳали унча ривожланмаган. Шундай шароитда чиқарилган IPO муваффақиятли бўлишига нима сизларни ишонтирди?

“Хўш, оммавий таклиф аллақачон муваффақиятли бўлди, лекин аввал айтганимдек, бу сафардаги бир қадам, холос. Лондондаги оммавий таклифсиз биз буни Ўзбекистонда қила олмаган бўлар эдик. Демак, бу бир узун йўл. Биз шундан бошлашимиз керак. Аввалроқ эшитганингиздек, Ўзбекистондаги ушбу таклиф ҳажми шу кунгача Ўзбекистонда ўтказилган барча бошқа IPO’лардан каттароқдир. Энди бизда платформа бор, бизда Ўзбекистонда бошқа IPO’ларни амалга оширишимиз мумкин бўлган андаза бор” ,- дейди Манраж Сеҳон.

-Турли эҳтимолларни инобатга олиб, IPO муваффақиятли бўлиши учун кейинги режалар қандай эди?

“Акция нархларининг ўзгариши, яъни тезда кўтарилиши келажакдаги IPO’лар учун яхши белги бўлиши керак. Бозорга кириб келадиган бошқа хусусий ва давлат компанияларида иштирок этадиган чакана инвесторлар сони тобора ортиб боради”, - дейди Темплетон вакили Мариус Дан.

 Эслатиб ўтамиз, миллий инвестиция фонди иқтисодиётнинг энергетика, транспорт, телекоммуникация ва молия соҳаларидаги 13 та компанияни бирлаштирган. Айни дам фонд таркибидаги компаниялар учун листинглар тайёрланмоқда ва хусусий сектор иштироки кенгайтириляпти.