Тобора кўпроқ америкаликлар Трампнинг иқтисодий сиёсатидан норози

Newsweek нашри эълон қилган American Research Group сўровига кўра, Трампнинг рейтинги унинг икки муддат президентлик давридаги энг паст даражага тушган. Сўров иштирокчиларининг 31 фоизи Трампнинг ишини маъқуллайди, 64 фоизи эса маъқулламайди. Апрель ойида бу кўрсаткичлар мос равишда 32 фоиз ва 63 фоиз эди.

SSRS томонидан CNN телеканали учун май ойида ўтказилган сўров натижаларига кўра, респондентларнинг 65 фоизи Трампнинг фаолиятини маъқулламаслигини, фақат 35 фоизи маъқуллашини маълум қилган. Апрель ойига нисбатан маъқулламаслик даражаси бир фоиз пунктга ошди.

Reuters/Ipsos компаниясининг сўнгги сўрови натижалари шуни кўрсатадики, респондентларнинг 35 фоизи Трампнинг президент сифатидаги фаолиятини маъқуллайди, 63 фоизи эса маъқулламайди. Reuters/Ipsos Трампни қўллаб-қувватлашнинг рекорд даражадаги пастлигини (34 фоиз) қайд этган апрель ойидаги кўрсаткичлар билан солиштирганда, америкаликларнинг президент фаолиятини маъқуллаш даражаси ошди. Бироқ, Reuters маълумотларига кўра, 2025 йил январь ойида Трамп иккинчи муддатини 42 фоиз маъқуллаш даражаси билан бошлаган.

Шунга ўхшаш манзарани The Economist ҳам қайд этди, унинг ҳисоб-китобларига кўра, май ойида Трампнинг фаолиятини респондентларнинг 37 фоизи маъқуллаган, 57 фоизи эса маъқулламаган.

Санаб ўтилган барча сўровномалар маълумотларига кўра, америкаликларнинг Трампнинг иқтисодий сиёсатидан норозилиги энг кўп ўсган.

Республикачилар партиясига овоз берувчи америкаликлар орасида ҳам Трампни қўллаб-қувватлаш даражаси пасаймоқда. Reuters/Ipsos маълумотларига кўра, май ойида рўйхатдан ўтган республикачи сайловчиларнинг 79 фоизи Трампнинг АҚШ президенти сифатидаги фаолиятини маъқуллашини айтган, апрель ойида бу кўрсаткич 82 фоизни, иккинчи муддатининг бошида эса 91 фоизни ташкил этган.

Ноябрь ойида АҚШда оралиқ сайловлар бўлиб ўтади, унинг натижаларига кўра республикачилар Конгресснинг иккала палатасида ҳам кўпчилик ўринларни эгаллай олиш-олмаслиги аниқланади. Республикачилар партияси сиёсий маслаҳатчиси Жанет Хоффманнинг Reuters агентлигига айтишича, Трамп рейтингининг пасайиши сайлов натижасига қандай таъсир қилиши мумкинлигини ҳозирча айтиш қийин. Шу билан бирга, у республикачи сайловчиларнинг аксарияти ҳамон Трампни қўллаб-қувватлашини таъкидлади. «80 фоиз ҳали ҳам анча катта рақам», деди у.