Россия Киевдаги «қарор қабул қилиш марказлари»га зарба бериш билан таҳдид қилди

Россия Ташқи ишлар вазирлиги Россия Қуролли кучлари аннексия қилинган Луҳанскдаги ётоқхонага берилган зарбага жавобан Киевдаги мудофаа корхоналари, «қарор қабул қилиш марказлари» ва қўмондонлик пунктларига зарба бериши билан таҳдид қилди.

ТИВ хорижликларни, жумладан, дипломатларни «имкон қадар тезроқ» Киевни тарк этишга, шаҳар аҳолисини эса «Зеленский режимининг ҳарбий ва маъмурий инфратузилма объектларига яқинлашмасликка» чақирди.

Россия Украинани 22 майга ўтар кечаси Луҳанскдаги Старобелск шаҳрига зарба беришда айбламоқда. Россия расмийлари педагогика коллежи ётоқхонаси ҳужумга учрагани, 21 киши ҳалок бўлганини маълум қилди. Украина Қуролли кучлари бош штаби ҳарбийлар Старобелск ҳудудида Россия армиясининг «Рубикон» штаб-квартирасига зарба берганини маълум қилди.

Владимир Путин Старобелскка берилган зарбадан сўнг ҳарбийларга «жавоб» тайёрлашни буюрди. Россия Қуролли кучлари 24 майга ўтар кечаси Киевга оммавий зарба берди, жумладан, «Орешник» ракетасидан фойдаланди. Оқибатда савдо марказлари ва маданий муассасаларга зарар етди, икки киши ҳалок бўлди, 81 киши яраланди.