Судларда коррупцияга қарши янги чоралар ва ҳарбий соҳада янги қўмондонлик — маҳаллий дайжест

Суд ходимларининг даромади ва мол-мулки декларация қилинади. Ҳарбий ҳаво кучлари жанговар қўмондонлиги ташкил этилди. Бувайда ҳокимининг собиқ ўринбосари жиноий жазога тортилди. Фарғонада Soliq Mobile орқали 3,2 млрд сўмлик кешбэк талон-торож қилинди. Бухородаги тергов ҳибсхонаси ходимларига нисбатан текширув бошланди. Куннинг муҳим янгиликлари билан таништирамиз.

Суд ходимларининг даромади ва мол-мулки декларация қилинади

Президент Шавкат Мирзиёев судларда коррупциянинг олдини олиш мақсадида комплаенс назорат тизими самарадорлигини оширишга оид тақдимот билан танишди.

Унда қайд қилинишича, суд тизимида коррупциявий хавф-хатарларни барвақт аниқлаш, манфаатлар тўқнашувининг олдини олиш ва ходимларнинг касбий масъулиятини юксалтириш муҳим вазифа бўлиб қолмоқда. Шу муносабат билан тақдимотда судларда комплаенс назоратини кучайтиришга қаратилган таклифлар муҳокама қилинди. Суд аппарати ходимлари орасида коррупциянинг олдини олиш мақсадида Олий суд таркибида Комплаенс назорати хизматини ташкил этиш таклиф этилди. Мазкур хизмат Олий суд раисига бўйсуниб, ҳудудий судларда ҳам фаолият олиб борувчи комплаенс инспекторларидан иборат бўлади. Комплаенс хизмати коррупциявий хавф-хатарларни аниқлаш, баҳолаш ва олдини олиш, уларнинг сабабларини бартараф этиш, ходимлар томонидан қонунчилик ва касб этикаси талабларига риоя этилишини мониторинг қилиш билан шуғулланади.

Судьялар учун манфаатлар тўқнашуви, даромад ва мол-мулк декларацияларини тақдим этиш ҳамда таҳлил қилишнинг автоматлаштирилган электрон тизими ишга туширилади. Худди шундай тизим суд аппарати ходимлари учун ҳам жорий этилади.

Ҳарбий ҳаво кучлари жанговар қўмондонлиги ташкил этилди

Ўзбекистонда Ҳаво ҳужумидан мудофаа қўшинлари ва Ҳарбий ҳаво кучлари қўмондонлиги негизида Қуролли кучлар Ҳарбий ҳаво кучлари жанговар қўмондонлиги ташкил этилади. Бу ҳақда давлат раҳбари ҳузуридаги тақдимотдан кейин мудофаа вазири Шуҳрат Холмуҳаммедов маълум қилди.

Вазир сўзларига кўра, президент Шавкат Мирзиёев Ҳарбий ҳаво кучлари жанговар қўмондонлигини ташкил этишга оид «тарихий фармон»ни имзолаган (ҳужжат ҳали эълон қилинмади). Янги ташкил этилаётган қўмондонлик замонавий рақамлаштирилган бошқарув тизимига эга бўлиши кўзда тутилган.

Унинг қўшимча қилишича, президент ҳарбий тиббиёт соҳасидаги ҳамкорликка доир Ўзбекистон–Туркия ҳукуматлараро битимни тасдиқлаш тўғрисидаги қарорни ҳам имзолади. Битимга кўра, даволаш иши, стоматология, фармацевтика, профилактика, тиббий касб-ҳунар ва ҳамширалик каби йўналишларда мутахассисларни ўқитиш, қайта тайёрлаш, малакасини ошириш, ўзаро тажриба алмашиш ва беморларни даволаш борасида ҳамкорлик қилиш белгиланмоқда.

Бувайда ҳокимининг собиқ ўринбосари жиноий жазога тортилди

Фарғона вилояти Бувайда тумани ҳокимининг қурилиш, тўсиқларсиз муҳит яратиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари лавозимида ишлаган Сайиджон Хизиров жиноий жазога тортилди. Kun.uz суд ҳужжати билан танишди.

Суд ҳукмида қайд қилинишича, Сайиджон Хизиров аҳоли дарахтлар кесилишига қаршилик қилаётганидан хабар топиб, ҳодиса жойига борган. У дарахт кесмоқчи бўлган ишчини тўхтатишга уринган экология инспектори Аҳроржон Ниёзовнинг ёқасидан тортиб, хизмат вазифаларини бажаришдан воз кечишга мажбур қилган. Оқибатда экология инспекторига енгил жароҳат етказган.

Суд ҳукми билан Сайиджон Хизиров Жиноят кодексининг 206-моддаси (ҳокимият ёки мансаб ваколати доирасидан четга чиқиш) 1-қисмида назарда тутилган жиноятни содир қилишда айбли деб топилди. Унга 1 йил мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилган ҳолда БҲМ 150 баравари миқдорида (61 млн 800 минг сўм) жарима жазоси тайинланган.

Фарғонада Soliq Mobile орқали 3,2 млрд сўмлик кешбэк талон-торож қилинди

Фарғона вилоятида бир гуруҳ шахслар Soliq Mobile иловасидаги кешбэк тизимидан ноқонуний фойдаланиб, давлат бюджети маблағларини талон-торож қилгани аниқланди. Терговга қадар текширувда улар сохта электрон ҳисоб-фактуралар ва харид чекларини расмийлаштириш орқали 3,2 млрд сўм кешбэк маблағини ўзлаштирганликда гумон қилинмоқда.

Бош прокуратура ҳузуридаги Департаментнинг Фарғона вилояти бошқармаси маълум қилишича, бир қанча фуқаролар ўзаро тил бириктириб, Telegram ижтимоий тармоғида турли номлардаги гуруҳлар ташкил этган. Улар мазкур гуруҳлар орқали 7 та корхона номидан расмийлаштирилган харид чеклари учун кешбэк суммаларини онлайн тарзда сотиш билан шуғулланган.

Текширувда аниқланишича, мазкур корхоналар томонидан ҳеч қандай реал молиявий операциялар амалга оширилмаган бўлса-да, гўёки 3,3 трлн сўмлик маҳсулот ва хизматлар сотилгани ҳақида сохта электрон ҳисоб-фактуралар расмийлаштирилган. Шунингдек, савдодан тушган маблағлар онлайн назорат-касса машиналари орқали кирим қилингани ҳақида маълумотлар шакллантирилиб, харид чеклари тарқатилган.

Бухородаги тергов ҳибсхонаси ходимларига нисбатан текширув бошланди

Ижтимоий тармоқларда Бухоро вилоятидаги 4-сон тергов ҳибсхонасида сақланаётган шахсга нисбатан қийноқ қўлланаётгани ҳақида тарқалган хабарлар юзасидан айрим ходимларга нисбатан терговга қадар текширув ҳаракатлари бошланди. Ҳолат Омбудсман томонидан назоратга олинган.

Маълум қилинишича, ҳолат юзасидан 4-сон тергов ҳибсхонасининг айрим ходимларига нисбатан терговга қадар текширув ҳаракатлари бошланган. Шу билан бирга, мурожаатда кўрсатилган шахсга нисбатан суд-тиббий экспертиза тайинланган.

Ўрганиш жараёнида тўпланган ҳужжатлар ва материаллар Жиноят-процессуал кодекси талабларига мувофиқ процессуал тартибда кўриб чиқиш учун Бухоро вилояти прокуратурасига тақдим этилган.