Трамп NBA финалида ҳуштакбозликка учради

Трамп Американинг NBA финалига ташриф буюрган илк президентига айланди. Бу унчалик тўғри қарор бўлиб чиқмади: аввалига мухлислар унга ҳуштакбозлик қилишди, кейин эса у ухлаб қолди. Қолаверса, унинг севимли жамоаси ютқазиб қўйди.

Mark Schiefelbein / AP / Scanpix / LETA

АҚШ президенти Доналд Трампга 8 июн куни «Ню-Йорк Никс» ва «Сан-Антонио Сперс» баскетбол жамоалари ўртасида Ню Йоркдаги «Мэдисон-сквер-гарден» стадионида ўтказилган Миллий баскетбол уюшмаси (NBA) финалида ҳуштакбозлик қилинди.

Трамп АҚШ тарихида бундай финалга ташриф буюрган илк президент бўлди. У ўйинни «Никс» жамоаси хўжайини Жеймс Доланнинг ложасида ўз набираси Кай ва шахсий маслаҳатчиси Борис Эпштейн билан бирга кузатди. Трамп – «Ню Йорк Никс»нинг эски мухлисларидан ҳисобланади, у 1990-йиллардан буён ушбу жамоа ўйинларини кузатиб келади.

Трампнинг ташрифи туфайли стадионда хавфсизлик чоралари кучайтирилди, Ню Йорк ҳукумати эса стадион атрофидаги кўчада катта экранларда ўйинни намойиш этишни бекор қилди.

Ўйин бошланиши арафасида миллий мадҳия ижро этилаётганида президентга ҳуштакбозлик қилинди. Президент аренадаги экранда бир неча сонияга кўриниш берганида мухлислар ҳуштакбозлик қилишди – бу вақтда Трамп табассум қилиб, ҳарбий салом йўллаётганди. Камералар «Никс» спортчиларига қаратилганидан кейингина ҳуштаклар ўрнини олқишлар эгаллади.

Трампнинг ўзи бундай қабулга хотиржам муносабатда бўлди. «Ўйлайманки, бу асосан олқишлар эди», – деди у ўйиндан сўнг журналистларга.

Ўйин вақтида Трамп ухлаб ҳам қолди.

Трамп ва NBA ўртасидаги муносабатлар аввалдан яхши эмас. Миллий баскетбол уюшмаси кўп йиллардан буён Америкадаги тўртта профессионал спорт лигалари орасида нисбатан «либерал» ҳисобланади, унинг кўплаб спортчилари эса Трампга қарши чиқишлар қилишади.

Лиганинг асосий юлдузлари – Кевин Дюрант, Стивен Карри, Леброн Жеймс кабилар президентни биринчи президентлик муддати даврида ҳам кўп марта танқид қилишган. 2017 йилда эса Трамп спортчиларнинг ўзи ҳақидаги кескин фикрлари туфайли NBA чемпиони бўлган «Голден Стэйт Уорриорс» аъзолари учун Оқ уйдаги анъанавий қабулни бекор қилганди.

Трамп ташриф буюрган ўйин тўрт ғалабагача ўйналадиган финаллар сериясидаги учинчи ўйин бўлди. Бу баҳсда «Сан-Антонио» 115:111 ҳисобида ғалаба қозонди. Ҳозирча «Ню-Йорк» серияда ҳисобда олдинда бормоқда – 2:1. Кейинги баҳс 11 июнга ўтар кечаси Ню Йоркда бўлиб ўтади.

Бу сафарги финал – 1999 йилги ҳал қилувчи сериянинг такрори бўлмоқда. Ўшанда ҳам финалда ушбу жамоалар тўқнашган ва унда «Сан-Антонио» 4:1 ҳисобида ғалаба қозонганди. Ўтган вақт мобайнида «Сперс» яна тўрт марта NBA чемпиони бўлди (охирги марта – 2014 йилда), «Никс» эса бирор марта финаллар сериясига чиқа олмаган. Ушбу жамоанинг охирги чемпионлиги 1973 йилга тўғри келади.