Саида Мирзиёева Амир Темур ҳақидаги “Адолат фасли” спектаклига юқори баҳо берди

Унинг таъкидлашича, ижодий жамоа Соҳибқирон сиймосини нафақат улуғ ҳукмдор ва саркарда, балки, аввало, беқиёс матонат эгаси, метин иродали инсон сифатида намоён эта олди.

Фото: Telegram / Saida Mirziyoyeva

Президент Администрацияси раҳбари Саида Мирзиёева Ўзбек миллий академик драма театрида “Адолат фасли” спектаклини томоша қилди ва унга юқори баҳо берди.

«Амир Темур ҳаётидан бир кун ҳақида ҳикоя қилувчи кучли саҳна асари бўлибди. Бош ролни куни-кеча “Буюк хизматлари учун” ордени билан тақдирланган Ёдгор Саъдиев ижро этди. Ўзбекистон халқ артистини кўп йиллик меҳнатининг юксак эътирофи ҳамда қутлуғ сана — 80 йиллик юбилейи билан чин дилдан табриклайман», деб ёзди у.

Саида Мирзиёеванинг таъкидлашича, ижодий жамоа Соҳибқирон сиймосини нафақат улуғ ҳукмдор ва саркарда, балки, аввало, беқиёс матонат эгаси, метин иродали инсон сифатида намоён эта олган.

«Биз бугун Миллий театримиз ва унга ҳаётини бағишлаган фидойи инсонларнинг улкан салоҳиятини қалбан ҳис этдик», деб қўшимча қилди у.