Трамп Нетаняҳуни ақлсизликда айблади ва Эрон билан келишув 2–3 соат ичида имзоланишини айтди

АҚШ президенти Доналд Трамп Эрон билан келишув «икки-уч соат ичида» тузилиши мумкинлигини айтди. Бу ҳақда у билан суҳбатлашган Fox News мухбири Трейт Игнст хабар қилди.

Трампнинг сўзларига кўра, келишув аввал электрон шаклда имзоланади, кейин эса бир ҳафта ичида томонлар уни «Европанинг бирор жойида» шахсан имзолайдилар.

Трамп шунингдек, Исроил бош вазири Бинямин Нетаняҳу билан телефон орқали мулоқот қилгани ва Байрут атрофига қилинган ҳужумлар бўйича уни сўроққа тутганини билдирди.

Исроилнинг N12 телеканалига берган интервюсида АҚШ президенти Нетаняҳуни «асло эҳтиёткор эмас» деб атади ва мазкур ҳужум томонлар ўртасида келишув имзоланишининг кечикишига сабаб бўлганини таъкидлади.

Axios нашри билан суҳбатда Трамп Эрон билан келишув кутилаётганидек якшанба куни имзоланишини тасдиқлади. Унинг айтишича, маслаҳатчилари Исроил Байрутга зарба бергани ҳақида айтишганида шокка тушган.

«Бу даҳшат - мен бунга ишона олмадим. Бу келишув имзолашимиздан бир соат олдин содир бўлди! Бибига бу ҳужумни амалга ошириш нега керак бўлди? Мен жуда ғазабландим. Унда соғлом фикр йўқлигини айтдим», — деди Америка етакчиси.

Трамп ўзининг Truth Social ижтимоий тармоғида Исроилнинг Байрут яқинига ҳужумини танқид қилди. Исроил армияси ҳужум нишонлари сифатида Ҳизбуллоҳнинг қўмондонлик марказини кўрсатганди.

Доналд Трамп аввалроқ 14 июн куни АҚШ ва Эрон ўртасида можарони якунлаш бўйича келишув имзоланишини маълум қилганди.

Ўз навбатида, Эроннинг Fars агентлиги Теҳрон Вашингтон белгилаган муддатда АҚШ билан келишувни имзолашга тайёр эмаслиги ҳақида хабар берди.