Хитойнинг йирик нефть-газ компанияси топ-менежери пора учун ўлимга ҳукм қилинди

Хитойда суд CNOOC давлат нефть ва газ компаниясининг собиқ бош ижрочи директори Юан Гуанюйни пора учун ўлим жазосига ҳукм қилди.

Reuters хабарига кўра, шунингдек, у сиёсий ҳуқуқларидан ва барча мол-мулкидан маҳрум этилди.

Тергов шуни кўрсатдики, 2001 йилдан 2022 йилгача топ-менежер шартномалар тузиш, бизнес юритиш ва лавозимларни эгаллашда ёрдам бериш эвазига пул ва қимматбаҳо буюмлар олган. Пора миқдори 152 миллион юандан (тахминан 22,5 миллион доллар) ошди.

Маълум қилинишича, 67 ёшли Юан айбига иқрор ва пушаймон бўлган, ноқонуний олинган маблағларни қайтарган ва тергов билан ҳамкорлик қилишга рози бўлган, шу сабабли ҳукм ижроси 2 йилга кечиктирилди. Кейинчалик, агар у янги жиноятлар содир этмаса, жазо умрбод қамоқ билан алмаштирилиши мумкин.

CNOOC Хитойнинг учинчи йирик миллий нефть компаниясидир. Бу сўнгги йилларда Хитойда судланган навбатдаги топ-менежер ҳисобланади. 2025 йил май ойида China National Petroleum Corp (CNPC) давлат компаниясининг собиқ раҳбари Ван Илинга 13 йиллик қамоқ жазоси тайинланди, у ҳам пора олишда айбдор деб топилди. Ноқонуний бойиш миқдори 35 миллион юандан ошди.

Хитой раҳбари Си Сзинпин энергетика ва молия каби соҳалардаги коррупционерларга нисбатан "шафқат" қилмаслигини айтган эди. Аввалроқ дунёдаги энг йирик банклардан бири бўлган Bank of China собиқ раиси Лю Лянге, China Merchants Bank собиқ президенти Тян Хуэйюй, China Citic Bank собиқ раҳбари Сун Дешун ва China Life Insurance собиқ раиси Ван Бин икки йилга кечиктирилган ўлим жазосига ҳукм қилинган эди.

Айрим ҳолларда ҳукмлар ижро этилган: масалан, 2021 йилда China Huarong давлат молиявий гигантининг собиқ раҳбари Лай Сяомин тахминан 1,8 миллиард юан пора олганликда айбдор деб топилиб, қатл этилган эди.