Тошкентда “свет” ўчиши оқибатида аттракционда қолиб кетган одамлар тушириб олинди

Бугун, 28 июн куни Тошкент шаҳри, Чилонзор тумани, Бунёдкор шоҳкўчасида жойлашган Dream Park истироҳат боғидаги «Чархпалак» аттракционида фуқаролар қолиб кетганлиги тўғрисида Тошкент шаҳар ФВББга хабар тушган.

Шунга кўра, қутқарув бўлинмалари зудлик билан ҳодиса жойига етиб борган ва ҳозирда барча фуқаролар чархпалакдан хавфсиз жойга тушириб олинган.

“Вазият Тошкент шаҳар ФВББ томонидан тўлиқ назоратга олинган. Ҳодиса оқибатида жароҳат олганлар йўқ”, дейилади ФВВ хабарида.

Аввалроқ Тошкент шаҳридаги «Юксак» подстанциясида юз берган носозлик сабабли пойтахтнинг Миробод, Чилонзор ва Яккасарой ҳамда Тошкент вилоятининг Зангиота туманларининг айрим ҳудудларида электр таъминотида вақтинча узилиш содир бўлгани хабар қилинганди.