Жаҳон чемпионатида бир нечта футболчи допинг билан қўлга тушди

Тунис миллий жамоасининг 2026 йилги жаҳон чемпионатида иштирок этган камида 8 нафар футболчиси допинг-тести мусбат натижа кўрсатди, деб хабар берди Daily Mail.

Текширувлар ўпкадаги нафас йўлларини бўшаштирувчи дори — кленбутерол борлигини кўрсатди. У Бутунжаҳон антидопинг агентлиги (WАDА) томонидан тақиқланган моддалар рўйхатига киритилган.

Бироқ, кейинчалик расмийлар модданинг мавжудлиги Мексикадаги жамоа базасида маҳаллий гўштни истеъмол қилиш билан боғлиқ бўлиши мумкинлигини аниқлади.

Футболчиларнинг клублари аллақачон вазиятдан хабардор қилинган, бироқ ўйинчиларга нисбатан қўшимча санкциялар қўлланилиши даргумон.

Баъзи мамлакатларда, жумладан, Мексикада, кленбутерол чорвачиликда қорамолларнинг ўсишини тезлаштириш учун ишлатилади, шу сабабли илгари ҳам спортчиларнинг организмига овқат орқали модда тушиши ҳолатлари қайд этилган. 2011 йилда Мексикада бўлиб ўтган ўсмирлар ўртасидаги жаҳон чемпионатида 109 нафар футболчи ижобий тест топширган, аммо ФИФА ва WADA озиқ-овқат ифлосланишини сабаб қилиб, санкциялар қўлламаган эди.

Тунис миллий жамоаси турнирда муваффақиятсиз иштирок этди: Швеция (1:5), Япония (0:4) ва Нидерландияга (1:3) ютқазиб, гуруҳ босқичидаги иштирокини якунлади.

Биринчи ўйиндан сўнг федерация бош мураббий Сабри Лямушини ишдан бўшатди - Тунис жаҳон чемпионатлари тарихида бир ўйиндан сўнг мураббийни алмаштирган илк давлат бўлди.