“Зарафшон дарёсида сув сарфи кескин ошгани сабаб бўлди” – Самарқандда темирйўл ўтказилган дамба ўпирилганига изоҳ берилди

Самарқандда темирйўл ўтказилган дамбани мустаҳкамлаш ишлари бошланган. “Ўзбекистон темир йўллари” АЖ ҳолат бўйича муносабат билдирди.

Маълум қилинишича, 3 июл куни Самарқанд вилояти Тойлоқ тумани ҳудудидан ўтувчи “Самарқанд – Ургут” темир йўл участкасининг маълум қисмига шикаст етган.

“Сўнгги кунларда Ўзбекистон ва Тожикистоннинг тоғли ҳудудларида кузатилган кучли ёғингарчиликлар оқибатида Зарафшон дарёсида сув оқими кескин кучайди. Бунинг оқибатида дарё қирғоқларини ювиб кетиб, айрим ҳудудларда ўзан йўналиши ўзгарди.

Ҳодисага Зарафшон дарёсида сув сарфининг меъёрий 80–100 м³/с ўрнига кескин ошиб, 300 м³/с гача етгани сабаб бўлди. Оқибатда дарё ўзани темир йўлга яқин ҳудудларда 30–40 метргача кенгайиб, ўзанга яқин жойлашган темир йўлнинг маълум қисмига зарар етди. Мазкур гидрологик ҳолат сўнгги 20 йил давомида кузатилмаган”, дейилади жамият муносабатида.

Айни пайтда ҳаракат хавфсизлигини таъминлаш мақсадида дарё қирғоқларини харсанг тошлар билан мустаҳкамлаш ишлари олиб борилаётгани билдирилган.

“Ишларга 15 та махсус техника жалб этилган. 30 та думпкар вагон орқали харсанг тошлар етказиб берилди. Шунингдек, зарур қурилиш материаллари юкланган яна 130 та думпкар вагон ҳудудга йўналтирилди”, дейилади хабарда.

Қайд этилишича, ҳозирда темир йўл қатновини имкон қадар қисқа муддатда тўлиқ тиклаш ҳамда поездлар ҳаракатининг узлуксизлигини таъминлаш бўйича барча зарур чора-тадбирлар амалга оширилмоқда.

Аввалроқ Тойлоқ тумани ҳудудидан ўтган янги темирйўл тармоғида фавқулодда ҳолат рўй бергани хабар қилинганди. Kun.uz ихтиёрига келиб тушган видеода дарё суви темирйўл ўтказилган дамбани ювиб кетгани, натижада релслар таянчсиз қолганини кўриш мумкин.