Рецепт асосида сотиладиган қарийб 2500 номдаги дори нархлари пасайтирилди

Антибиотиклар ва микробларга қарши воситалар — 50 фоизгача, юрак-қонтомир тизими дорилари — 37 фоизгача, асаб тизими дорилари — 40 фоизгача ҳамда яллиғланишга қарши ва оғриқ қолдирувчи воситалар — 42 фоизгача арзонлашган.

Фото: Валерий Матыцин/ТАСС

Рецепт асосида бериладиган қарийб 2 500 та дори воситаси учун чекланган нархлар қайта шакллантирилди ва 1 июлдан дорихоналар учун кучга кирди, деб хабар қилди Тиббиёт ва фармацевтика тармоғини ривожлантириш агентлиги.

Қайд этилишича, натижада айрим тоифадаги дори воситалари нархлари сезиларли даражада пасайди.

Хусусан, антибиотиклар ва микробларга қарши воситалар — 50 фоизгача, юрак-қонтомир тизими дорилари — 37 фоизгача, асаб тизими дорилари — 40 фоизгача ҳамда яллиғланишга қарши ва оғриқ қолдирувчи воситалар — 42 фоизгача арзонлашди.

“Фуқаролар pharm.gov.uz сайти ҳамда "PharmUz" мобил иловаси орқали рецепт асосида бериладиган дори воситаларининг чекланган нархларини мустақил текшириш, уларни амалдаги нархлар билан таққослаш ҳамда аниқланган ҳолатлар юзасидан мурожаат йўллаш имкониятига эга”, дейилади хабарда.