«Қизил чизиқдан ўтилди». УЕФА Инфантинони ағдармоқчи

УЕФА ФИФАнинг ЖЧ-2026 1/8 финалида Белгия билан ўйин олдидан АҚШ миллий жамоаси форварди Фоларин Балогунга нисбатан дисквалификацияни кечиктириш тўғрисдаги қарорига муносабат билдирди. Иттифоқ бу борада расмий баёнот берди, инсайдерлар эса ташкилотнинг Жанни Инфантинони халқаро футбол федерацияси раҳбарлигидан кетказиш режалари ҳақида хабар бермоқда.

Муқобилсиз сайловдан кейинги муқобил номзод

УЕФАдагилар, катта эҳтимол билан, Жанни Инфантинонинг ФИФАдаги бошқарувидан чарчаган. The Guardian журналисти Роман Молинанинг айтишича, ташкилот Халқаро футбол федерацияси президентлиги учун навбатдаги сайловларга ўз номзодини тайёрламоқда.

Инфантинога рақобатчи тайёрланаётгани ҳақидаги хабарини журналист АҚШ миллий жамоаси футболчиси Фоларин Балогуннинг дисквалификацияси кечиктирилиши тўғрисидаги қарор футбол жамоатчилигида катта норозилик уйғотиши фонида эълон қилди. Ушбу футболчи 1/16 финалда Босния ва Ҳерцеговинага қарши ўйинда қизил карточка олган бўлса-да, кейинги босқичда Белгия билан ўтадиган ўйинда майдонга тушиши мумкин.

Журналист Бен Жейкобс хабарига кўра, Оқ уйдагилар ушбу футболчига қўлланган жазони қайта кўриб чиқишни сўраб, тўғридан тўғри ФИФА президентига мурожаат қилган. Молинадаги маълумотларга кўра, бундай можароли қарордан кейин нафақат Европадаги футбол федерациялари, балки бошқа қитъалар вакиллари ҳам ташкилотга Инфантино ўрнига бошқа номзод топилишини хоҳлашмоқда.

«Доналд Трампга ёқиш учун қабул қилинган қарордан кейин (моҳиятан, гап айнан шу ҳақда кетмоқда) жаҳон футболининг бошқа раҳбарлари – нафақат Европадагилар – муқобил номзод топиш имкониятини муҳокама қила бошлашди, чунки улар «ортиқ бундай давом этиши мумкин эмас» деб ҳисоблайди. Аммо гапириш – бошқа, ҳаракатга киришиш – бутунлай бошқа иш. Бунинг учун жасорат керак бўлади, лекин футбол раҳбарларининг кўпчилигида бундай жасорат йўқ», – дея хабар қилган журналист.

Инфантино 2016 йилги сайловларнинг иккинчи турида Осиё футбол конфедерациясининг ўша вақтдаги президенти Салмон ибн Иброҳим Ал-Халифа устидан ғалабага эришиб (88 га қарши 115 овоз билан), ФИФА раҳбарлигига келганди. 2019 ва 2023 йиллардаги сайловларда эса Инфантинога ҳеч ким рақобат кўрсатмади ва у лавозимга қайта сайланди. Катта эҳтимол билан, энди жаҳон футболидагилар ундан чарчаган.

«Яхлитлик хавф остида»

Душанба куни УЕФА ўз пресс-релизида Балогун атрофидаги вазиятдан норозилигини очиқчасига билдирди.

«Кеча футболчи Фоларин Балогунга кўрсатилган қизил карточкадан кейинги автоматик бир ўйинлик дисквалификация қўлланишини бир йилга тўхтатиш тўғрисида қабул қилинган орқали қизил чизиқ кесиб ўтилди», – дея бошланади ташкилот баёноти.

Бундан ташқари, Европа футбол ассоциациялари иттифоқи четлатишдан кейинги мажбурий дисквалификация ҳақидаги қоида турлича талқин қилинмаслиги кераклигини қайд этган.

«Қоидаларнинг аниқлиги уларнинг сақловчилари томонидан кафолатланмай қўйса, ўйиннинг яхлитлиги хавф остида қолади, мусобақага бўлган ишонч эса сусаяди... Бундай бемисл, ақлга сиғмайдиган ва ўзини оқламайдиган қарорга ишончсизлик билдирамиз», – дейилади баёнотда.

ФИФА собиқ президент Йозеф Блаттер ўз ворисини танқид қилган.

«Агар АҚШ президенти ташкилот раҳбари ишларига аралашса ва футболчининг дисквалификацияси жаҳон чемпионати плей-офф ўйини олдидан бирдан бекор қилинадиган бўлса, шундай савол туғилиши муқаррар: «Сен қаерга кетяпсан, ФИФА?» – дея ёзган функционер ижтимоий тармоқларда.

«Ливерпул» собиқ бош мураббийи, шу кунларда Германия миллий жамоаси бошқарувига тайинланиши кутилаётган Юрген Клопп ҳам бу борада кескин фикр билдирди.

«Келинг шундай деймиз: футбол – бу уларнинг эмас, бизнинг ўйин. Футболда ҳеч нарсани тушунмайдиган бу икки одам умуман бундай масалаларни ҳал қилмаслиги керак. Бу аниқ қизил карточка эди. Бу борада икки хил фикр бўлиши мумкин эмас. Балогунга ачинамиз, чунки у бу ҳаракатни атайлаб қилмаган. Аммо қоида – бу қоида», – дея германиялик мутахассис сўзларини келтиради Bayern&Germany портали.

ФИФА раҳбарини Англия миллий жамоаси собиқ форварди Уэйн Руни ҳам танқид қилган. «Инфантино бундай қарор учун уялиши керак. Бу ерда спорт принципи шубҳа остида қолади. Агар мен АҚШ жамоаси рақиби бўлганимда, жуда ғазабланган бўлардим. Бу ҳар жиҳатдан нотўғри», – деган у BBC эфирида.

ФИФА президентлиги учун кейинги сайловлар 2027 йилда бўлиб ўтади.