Афсоналарнинг кўз ёшлари ва Трампни тролл қилган Белгия. ЖЧда 1/8 финалнинг асосий воқеалари

Футбол бўйича 2026 йилги жаҳон чемпионати ҳам ниҳоясига яқинлашмоқда. 48 жамоадан 40 таси аллақачон турнирни тарк этди, қолган бир ярим ҳафта ичида саккиз жамоа бош соврин учун кураш олиб боради. Қуйида чоракфинал ўйинлари олдидан нимчоракфиналдаги энг ёдда қоларли ҳолатлар эслаб ўтилади.

Марокаш ўз рекордини такрорлаши мумкин

Африкаликлар Канадага қарши биринчи бўлимни нурсиз ўтказишган ва рақиб дарвозасига деярли таҳдид солишмаганди (xG бўйича 0,02). Марокашликлар плей-оффнинг дастлабки ўйинида Нидерландияга қарши 120 дақиқа давом этган ўйиндан тиклана олмагандек тасаввур уйғонганди. Аммо танаффусдан кейин Африка жамоаси савия борасидаги фарқни кўрсатиб қўйди ва турнир мезбонларини қарши ҳужумларда жазолаб, йирик ҳисобда ғалаба қозонди (3:0). Энди Муҳаммад Ваҳби шогирдлари тўрт йил олдинги турнирда қайд этилган тарихий натижани (яримфинал) такрорлаш учун яна бир ўйинда ғалаба қозониши керак бўлади, аммо бу ўйин турнир ғолиблиги учун асосий фаворит сифатида кўрилаётган Францияга қарши кечади.

Турнирнинг энг хунук ўйини

Парагвайлик футболчилар ўйиндан олдин Францияга қарши деярли имконияти йўқлигини тушуниб турганди, шунинг учун жамоа бош мураббийи уларга рақиб ҳужумчиларига исталган усулни қўллаб бўлса-да ўйин бермасликка кўрсатма берди. Жамоа фақат дуранг ҳисобни сақлаб қолиш ва ўйинни пеналтилар сериясига олиб бориш, у ерда эса дарвозабон Орландо Гилнинг маҳоратига таянишни кўзлади (ушбу посбон олдинги босқичда Германияга қарши пеналтилар серияси қаҳрамони бўлганди). Ўйиннинг катта қисми айнан улар хоҳлаган сценарийда кечди – жанубий америкаликлар исталган нуқтада фол ишлатишди, бир неча бор рақибни ҳакамнинг кўз ўнгида уришди. Аммо фойдаси бўлмади – французлар Килиан Мбаппе пеналтидан урган гол эвазига минимал ҳисобда ғалаба қозонишди (1:0). Ўйиндан кейин ўзбекистонлик ҳакам Илгиз Танташев муҳокамалар марказида қолди – у ҳаддан ташқари қўпол ўйин намойиш этган парагвайликларни бирор марта огоҳлантирмади, жабрланувчи ролидаги французларга эса уч марта сариқ карточка кўрсатди. Бундай қарорлари туфайли у кесин танқидга учради – L'Equipe нашри унинг ишини бир баллга баҳолади.

Ушбу ўйин атрофида баҳслар ҳамон давом этмоқда: аввалига парагвайлик сенатор ўйиндаги ҳаракатлари учун Килиан Мбаппе манзилига заҳарли сўзлар айтиб, ирқчилик руҳидаги пост ёзди, футболчи уни «жирканч хотин» деб атаб, жавоб қайтаргач, ўзини жабрдийда қилиб кўрсатмоқда ва уни судга бериш билан таҳдид қилмоқда.

Норвеглар ҳаммаёқни забт этмоқда

Скандинавлар ва жаҳоннинг беш карра чемпионлари ўртасидаги ўйинда статистик аномалия давом этди – бразиллар бунгача Норвегияни бирор марта енга олмаганди ва ўзаро бешинчи тўқнашувда ҳам буни уддалай олмади. Бунга скандинавлар анчадан буён жаҳон биринчиликларига келмагани ҳам сабаб (охирги иштирок 1998 йилда кузатилганди) бўлган, аммо ушбу жамоанинг ҳозирги таркиби амалда ҳам рақибдан кучлилик қилди. Эрлинг Ҳоланд Бразилия дарвозасига дубл қайд этиб, илк мундиалидаёқ етти гол уришга улгурди ва жамоасини ўз тарихида илк бор жаҳон чемпионати чоракфиналига олиб чиқди. Викинглар эшкак эшишда ва мухлислар қалбини забт этишда давом этди.

Бразилия ва шахсан Карло Анчелотти учун турнир муваффақиятсизлик билан тугади, энг яхши даврлари ўтиб кетган Неймарнинг ўйнатилиши эса ушбу муваффақиятсизлик рамзига айланди. 34 ёшли футболчи бу ўйиндан кейин кўзда ёш билан Бразилия миллий жамоасидаги фаолиятини якунлади.

Жангдан омон чиққан Англия

Томас Тухел шогирдлари 1/8 финалда Мексиканинг кучли қаршилигига дуч келди. Денгиз сатҳидан 2200 метр баландликда жойлашган «Ацтека» ўйингоҳи эса қўшимча қийинчиликлар туғдирди. Англия ўйиннинг 54-дақиқасида Куанса четлатилгани туфайли қолган вақт мобайнида ўн киши бўлиб, ҳимояланишига тўғри келди. Лекин жаҳон чемпионати ўйинларида Мехикодаги ушбу ўйинда бирор марта ютқазмаган Мексика шу куни рақибнинг тиғиз ҳимоясини ёриб ўта олмади (2:3). Ўйинда катта куч йўқотган инглизлар ҳакам ҳуштаги чалиниши билан газонга қулади, жамоа сардори ва тўпурари Ҳарри Кейн эса ўйиндан кейин овози бўғилиб қолгани учун интервю ҳам бера олмади. Лекин бундай оғир жангдан омон чиққан инглизларни энди ҳеч қандай рақиб қўрқита олмаслиги аниқ.

Роналдунинг қуёши ботди

Криштиану ўзининг олтинчи жаҳон чемпионатини ҳам кўз ёшлар билан якунлади Турнирни шусиз ҳам жуда бўш ўтказган Португалия бу босқичда испанлар армадасининг кучли босими остида қолди ва деярли ҳеч нарса билан жавоб қайтара олмади – барча овертаймни кутаётганида эса захирадан тушган Микел Мерино 90+1-дақиқада ғалаба голини урди. Мағлубиятдан кейин бош мураббий Роберто Мартинес истеъфога чиқди. У сўнгги уч йил мобайнида кучли таркиб билан кутилган натижа кўрсата олмади, ОАВда эса у нумерологияга муккасидан кетгани ва 2026 йилдаги 6 рақами жамоа учун омад келтиришини (2016 йилда Португалия Европа чемпиони бўлганини далил сифатида келтирган) тинмай таъкидлагани, ўйин борасида эса ҳеч қандай ғоя таклиф эта олмагани ҳақида ёзишди. Амалда унинг жамоаси 6 июл куни турнирни тарк этди, бунга рақибнинг «6» рақамли футболчиси урган гол сабаб бўлди. 

Роналду жамоа учун муаммога айлангани ҳақида ҳам турли баҳслар юзага келди, аммо амалда жамоанинг энг яхши тўпурари айнан у бўлди. Навбатдаги муваффақиятсизликдан кейин ушбу футболчи бу фаолиятидаги сўнгги жаҳон чемпионати бўлиб қолишини маълум қилди. «Бизга бироз омад етишмади, чунки улар сўнгги дақиқаларда гол уришди. Бу жуда кескин, тенг ўйин бўлди. Биз ҳам, улар ҳам ютишимиз мумкин эди. Кўз ёши? Чемпионатни шундай тарк этаётганда одам хафа бўлиши табиий ҳол. Аммо яна бир бор таъкидлайман: мен қўлимдан келган ҳамма нарсани қилдим ва виждоним пок бўлиб кетяпман», – деган ҳужумчи.

У жамоа учун қўлидан келгани, Португалия ўз тарихидаги учта совринни (2016 йилги Европа чемпионлиги, 2019 ва 2025 йилларда Миллатлар лигаси) айнан у билан қўлга киритилганини таъкидлади.

Белгия жазоловчи ролида

АҚШ ва Белгия ўртасидаги ўйин арафасида футбол майдонида фақат бир мавзу – Фоларин Балогуннинг мажбурий дисквалификацияси шартли жазога алмаштирилгани ҳақидаги хабар муҳокама қилинди. Ушбу ҳужумчи 1/16 финалда Босния билан ўйинда қизил карточка олганди ва кейинги ўйинни ўтказиб юбориши керак эди. Маълум бўлишича, вазиятга Доналд Трамп аралашган, АҚШ президенти шахсан Жанни Инфантинога қўнғироқ қилиб, жамоанинг асосий ҳужумчиси Белгия билан ўйинда иштирок этишига имкон беришни сўраган. Шундан кейин бутун дунё Белгияга мухлислик қила бошлади, АҚШ футболчилари эса кучли босим остида қолишди. Почеттино шогирдлари шу куни турнирдаги энг ёмон ўйинини ўтказди ва йирик ҳисобда мағлуб бўлди, Балогун эса ҳеч нарса қила олмади (1:4). Ромелу Лукаку томонидан урилган тўртинчи голни эса Белгия футболчилари АҚШ президентини масхара қилган ҳолда нишонлашди: Лукаку Трампнинг махсус рақсини ижро этди, қолганлар унга қўшилишди.

Минглаб мухлисларнинг нафратига учраган Балогуннинг ўзи бу вазиятни хотиржамлик билан қабул қилди ва қарор қабул қилинишида иштирок этмаганини айтиб чиқди: «Қизил карточка борасидаги қарорга рози бўлгандим. Ўйнашга рухсат беришганида яна рози бўлдим. Жараёнда ҳеч қандай иштироким йўқ. Бу менга боғлиқ эмасди».

Месси иштирокидаги мўъжиза

Миср амалдаги чемпионларга қарши ўйинда бир бош баланд сакради ва шов-шувли сенсацияга яқин келди. Аргентиналиклар эса ўйиннинг 79-дақиқасида ҳам 0:2 ҳисобида ортда бораётганди ва турнирни тарк этишга яқин эди. Месси бу ўйин бошида жаҳон чемпионати тарихидаги энг ёмон пеналтичи мақомини ўзиники қилганди – бунгача мундиалда ҳеч бир футболчи бир турнирда иккита пеналтини йўққа чиқармаганди (Лео гуруҳ босқичида Австрияга қарши ўйинда ҳам 11 метрдан аниқ зарба беролмаганди). Аммо ўйиннинг охирги қисмида Лео энг юқори режимини ёқди ва ўйин тақдирини ҳал қилди. У дастлаб Ромерога голли узатма берди ва жаҳон чемпионати тарихидаги энг яхши ассистентга айланди (9). Кейин эса турнирдаги голлари сонини 8 тага етказиб (жами 21), ҳисобни тенглаштирди.

Ўйинга қўшиб берилган дақиқаларда эса қарши ҳужумда Энцо Фернандес Лаутаро Мартинеснинг узатмасидан фойдаланиб, ғалаба голини урди. Шу тариқа, мисрликлар тарихий ғалабани расмийлаштириш ўрнига тарихий камбэкка гувоҳ бўлишди. Шу билан бирга, африкаликлар жамоаси вакиллари мағлубиятни тан олишмади ва ўйиндан кейин ҳакамларни ҳам, ФИФАни ҳам коррупцияда айблаб, чиқишлар қилишди.

Швейцариянинг сабри

Турнирдаги олдинги тўрт ўйинида Колумбия ҳеч бир рақибга ўйин бермаганди ва керакли натижаларни қўлга киритганди. Жанубий Америка вакилларига турнир сеткасининг ўнг қисмидаги сирли тойчоқ мақоми ҳам берилаётганди, аммо Швейцария барчасини бекор қилди – Мурат Якин жамоаси 120 дақиқа давомида рақибни зарарсизлантиришни уддалади. Ўйин томошабоп кечмади, аммо европаликлар натижа учун барчасини қурбон қилишга тайёр эди ва якунда жамоа пеналтилар сериясида устун келиб, 1954 йилда ўз уйида ўтган жаҳон чемпионатидан буён илк бор чоракфиналга чиқди. Энди бу жамоа кейинги босқичда Аргентинага ҳам жиддий муаммо туғдиришига кўпчиликда шубҳа йўқ.