iPhone 18 Pro янги камера ва аккумулятор туфайли сезиларли даражада қалинлашади

Янги смартфон корпусининг қалинлиги 9,9–10,9 миллиметрни ташкил этади. Ҳозирги моделда бу кўрсаткич 8,75 миллиметрга тенг.

Фото: Javi Losana / X

Бўлажак iPhone 18 Pro ўзидан олдинги iPhone 17 Pro’дан қалинроқ бўлади, деб хабар берди Fixed Focus Digital инсайдери. Унинг маълумотларига кўра, смартфон тахминан икки миллиметрга қалинлашади.

Демак, янги смартфон корпусининг қалинлиги 9,9–10,9 миллиметрни ташкил этади. Ҳозирги моделда бу кўрсаткич 8,75 миллиметрга тенг. Камера блокининг бўртиб чиққан қисми ҳам катталашади — 11,54 миллиметргача (аввалгисида 11,23 миллиметр).

Ўлчамларнинг катталашиши янгиланган асосий камера билан изоҳланмоқда. Миш-мишларга қараганда, iPhone 18 Pro биринчи марта ўзгарувчан диафрагмали сенсорга эга бўлади. Айтганча, у Apple учун ҳозирги объективдан қарийб 50 фоиз қимматроққа тушади, бу эса қурилманинг якуний нархига ҳам таъсир қилиши мумкин.

Корпус ҳажмининг ортиши аккумулятор билан ҳам боғлиқ бўлиши мумкин: миш-мишларга кўра, Pro Max версиясининг сиғими 5567 мА·соат (ҳозирги авлодда 5088 мА·соат) кўрсаткичига ошади. Шу билан бирга, смартфон ўтган йили тақдим этилган текис қиррали алюминий ромларни сақлаб қолади. Компания ҳозирча титанга қайтишни режалаштирмаяпти.

Янги флагманлар сентябрь ойида биринчи букланма iPhone билан бир вақтда чиқарилиши кутилмоқда.