Britaniya OAVda yozilishicha, tanalarining rangi boshqacha bo‘lgan yangi egizaklar juftligi aniqlandi. The Daily Mail nashri ularning nomini keltirdi – G‘arbiy Londonda yashovchi to‘rt yoshli Bobbi va Rayli Jorjlar. Ularning onasi oq tanli Ebigeyl Tang hamda otasi aralash irq vakili Richard Jorjdir.
Egizaklardan birinchisi – Bobbining tanasi oq rangda, ko‘zlari ko‘k, Rayli esa qora tanli, ko‘zlari jigarrang.
Egizaklar 2011 yil oktabrida dunyoga kelgan. Dastlab ular bir xil ko‘ringan. Tashqi ko‘rinishdagi farqlar 6 haftada ko‘zga tashlana boshlagan. Egizaklarning fe'l-atvorlari ham turlichadir: Bobbi borgan sayin mustaqil va faol bolakayga aylanib borayotgan bo‘lsa, Rayli, aksincha, kamharakat va erinchoqdir.
Juftlikning 17 oylik Ameliya ismli qizi ham bor. Aytishlaricha, qizaloq qisman otasiga, qisman onasiga o‘xshaydi.