Turkiya Eron matbuotining Erdo‘g‘anning Saudiyadagi qatllarga aloqador ekanligi haqidagi iddaolarini inkor qildi

Turkiya TIV Eron elchisini chaqirib, undan matbuotda boshlab yuborilgan, prezident Rajab Toyib Erdo‘g‘anning Saudiya Arabistoniga borishini u yerda amalga oshirilgan qatllar bilan bog‘layotgan kampaniyani to‘xtatishni talab qildi. Bu haqda Reuters agentligi xabar bermoqda.

“Biz Eron davlat strukturalariga yaqin OAVda paydo bo‘lgan, prezidentimizning Saudiya Arabistoniga amalga oshirgan tashrifini u yerda ijro etilgan qatllar bilan bog‘layotgan xabarlarni keskin qoralaymiz”, - deb bayonot berdi TIV.

Erdo‘g‘an Saudiyaga o‘tgan yil dekabrining oxirida borgan edi. 2 yanvar kuni ushbu mamlakat IIV 47 kishiga nisbatan o‘lim jazosi ijro etilganini, ular sirasida taniqli shia ilohiyotchisi Nimr an-Nimr bo‘lganini xabar qildi.

Shu asosda ayrim eronlik jurnalistlar Erdo‘g‘anning qatllarga aloqadorligini gumon qila boshladi. Turkiya bu xabarlarni o‘ziga qarshi qaratilgan puxta rejalashtirilgan kampaniyaning bir qismi deb baholamoqda.