Mohir fermer shoti ekib, arava undiradi

Davlatimiz rahbarining 2012 yil 22 oktabrdagi “O‘zbekistonda fermerlik faoliyatini tashkil qilishni yanada takomillashtirish va uni rivojlantirish chora-tadbirlari to‘g‘risida”gi farmoni fermerlik harakati taraqqiyotida yangi bosqichni boshlab berdi. O‘zA Navoiy viloyatida fermer xo‘jaliklarini ko‘p tarmoqliga aylantirish maqsadida amalga oshirilayotgan ishlarga e'tibor qaratdi.

Xabarda keltirilishicha, viloyatda shu maqsadda 684 loyiha amalga oshirildi. Xususan, Karmana tumanidagi 200 dan ziyod fermer xo‘jaligida ham qo‘shimcha tarmoqlarni tashkil etishga alohida e'tibor qaratilmoqda. O‘tgan yili tumanda bu borada 118 loyiha o‘zlashtirildi. 16 ishbilarmon fermer sut va go‘sht yetishtirishni, 14 tasida parrandachilik yo‘lga qo‘yildi.

Baliqchilik bilan shug‘ullanuvchi fermer xo‘jaliklari soni 8 taga yetdi. 4 fermer xo‘jaligining 9,5 gektarlik maydonida intensiv bog‘ tashkil etildi. Mevali bog‘lar maydoni 533 gektarga yetdi. Bundan tashqari, asalarichilikni yo‘lga qo‘yayotgan yoki issiqxona tashkil etib, aholi dasturxoni to‘kinligiga munosib hissa qo‘shayotgan fermerlar soni ham ortmoqda.

“Sevoltepa ravnaqi” fermer xo‘jaligi tumanda ilg‘or xo‘jaliklar qatorida tilga olinadi. Bu bejiz emas. Abdurazzoq Rizayev rahbarlik qilayotgan xo‘jalikning umumiy ekin maydoni 97 gektar. Xo‘jalikka asos solingan 2000 yildan buyon belgilangan rejani ortig‘i bilan ado etib keladi.

Fermer o‘z maqsadlarini bosqichma-bosqich amalga oshira boshladi. Dastlab, qishloq xo‘jaligi texnikalarini ta'mirlash ustaxonasi tashkil etdi. Texnikalar uchun agregatlar tayyorlash maqsadida yo‘nuv va temirchilik sexi faoliyatini yo‘lga qo‘ydi.

Tadbirkor fermer joriy mavsumda yana bir yangilikni amaliyotda qo‘lladi. Kuzgi shudgorlash davrida har bir gektar yerga 30 kilogramm kaliy, 100 kilogramm ammofos va ma'lum miqdorda azot o‘g‘iti sepdi. Bu tajriba o‘z-o‘zidan paydo bo‘lgani yo‘q. Shu usulni qo‘llash natijasida mirishkor o‘tgan yili g‘allaning gektaridan 75-80 sentnergacha hosil olishga erishdi.

– Fermer shoti ekib, arava undiradigan bo‘lishi kerak. Zamonning talabi shunday, – deydi mirishkor. – O‘tgan yili yerning tekisligini aniqlovchi “Topcon” rusumli monitorli maxsus lazer dasgohini xarid qildik.

Bu uskuna maydon markaziga o‘rnatilib, yerning do‘ng-past qismlarini ko‘rsatadi, yerni suv sathidek tekislab chiqadi. Mazkur usul yordamida suv sarfi kamayib, qadalgan urug‘ bir maromda sug‘oriladi. Bu hosilga hosil qo‘shishning muhim omilidir.

– Fermer xo‘jaliklarini zamonaviy agregat va texnikalar bilan ta'minlashga alohida e'tibor qaratilayotir, – deydi “O‘zqishloqxo‘jalikmashlizing” aksiyadorlik lizing kompaniyasi Navoiy viloyati filiali yetakchi mutaxassisi Umar Qurbonov. – Xususan, o‘tgan yili hududdagi fermerlarga 9 milliard 522 million so‘mlik 153 dona qishloq xo‘jaligi texnikasi yetkazib berildi.

123 fermer xo‘jaligi tomonidan xarid qilingan texnikalar ish unumi va hosildorlikni oshirishda muhim omil bo‘lmoqda.Lizing shartlarining tobora sodda va uzoq muddatli ko‘rinishga keltirilishi fermerlarga qator qulayliklar yaratmoqda.

Jumladan, ayni paytda lizing to‘lovlari avvalgisidan farqli o‘laroq yillik 5-6 foizdan, 4,5 foizga tushirildi. Foiz to‘lovlari sharti o‘zgartirildi. Lizing muddati 7 yildan 10 yilga uzaytirildi.