Qohiraga falokatga uchragan EgyptAir samolyoti yo‘lovchilarining jasadlari yetkazildi

Qohiraga EgyptAir aviakompaniyasining falokatga uchragan A320 samolyoti qurbonlari qoldiqlari solingan 15 ta quti yetkazildi, deb xabar bermoqda Youm7.

Ta'kidlanishicha, sud-tibbiyot mutaxassislari jasadlar kimga tegishli ekanini aniqlash uchun halok bo‘lganlarning qarindoshlaridan DNK-namunalar yig‘ishni boshlashgan.

EgyptAir aviakompaniyasining Parijdan Qohiraga MS804 reysi bilan kelayotgan samolyoti O‘rta Yer dengizida, Misr havo hududida radarlardan yo‘qolib qolgan. Samolyotda 66 nafar yo‘lovchi va ekipaj a'zolari bo‘lgan.