Apple'ning  Avstraliyadagi xodimlari mijozlar telefonidan shaxsiy suratlarni o‘g‘irlaganlikda ayblanmoqda

OAVda Brisbenidagi (Avstraliya) Apple do‘konlaridan birida faoliyat yurituvchi xodimlarning mijozlar telefonidan shaxsiy suratlarni o‘g‘irlashgani, shuningdek xaridorlar va hamkasb ayollarni bildirmasdan suratga olishganiga doir xabar tarqaldi. Bu haqida The Courier Mail ma'lum qildi. 

Manbaga ko‘ra, bu suratlar Kvinslenddagi boshqa do‘konlar xodimlariga suratdagilarning qomatiga baho berish uchun yo‘llangan. 

Suratlar bilan bog‘liq mojaro tufayli 4 nafar erkak xodimning ishdan bo‘shatilgani hamda vaziyatni to‘g‘irlash maqsadida xorijlik mutaxassisning jalb qilingani ta'kidlangan.

Apple'da mazkur ish yuzasidan tergov o‘tkazilayotgani hamda do‘konning bir necha xodimi ishdan bo‘shatilgani ma'lum qilingan. Shu bilan birga kompaniya vaziyat qurbonlari orasida mijozlar bo‘lgani haqidagi ma'lumotni inkor etgan.