OAV: Buyuk Britaniyada Rojdestvo vaqtida fuqarolik aviatsiyasi vakillari ish tashlashmoqchi

Rojdestvo bayrami vaqtida Buyuk Britaniyaning British Airways aviakompaniyasi bortkuzatuvchilari ish tashlashmoqchi. Bu haqda 16 dekabrda OAV ma'lum qildi.  

Ma'lumotlarga ko‘ra, norozilik aksiyalari 25-26 dekabrlarga belgilangan. Unite kasaba uyushmasi tomonidan qo‘llab-quvvatlanuvchi ish tashlashda kompaniyaga 2010 yildan ishga kirgan 4,5 ming xodim ishtirok etishi mumkin. Ular past ish haqiga qarshi norozilik bildirishmoqda. 

Buyuk Britaniyaning eng yirik aviakompaniyasi kasaba uyushmalarning bu qarorini "rejalashtirilgan, berahm va mutlaq keraksiz aksiya" deb atadi. Kompaniya, shuningdek, ish tashlash uzoq masofalarga belgilangan parvozlarga ta'sir qilmasligini aytdi.

Agar bu ish tashlash o‘tkazilishi tasdiqlansa, u Rojdestvo ta'tillarining eng qizg‘in vaqtiga belgilangan boshqa norozilik aksiyasidan keyinoq bo‘lib o‘tadi. 16 dekabrda Unite Buyuk Britaniyaning 18 ta yirik aeroportida 48 soatlik ish tashlashlar o‘tkazilishini ma'lum qilgandi. 23 dekabrda soat 00:01 da boshlanadigan aksiyada dunyodagi eng yirik kompaniya – aeroport xizmatlari ko‘rsatuvchi Swissport’ning 1,5 ming xodimi ishtirok etishi kerak. Unga ko‘ra, reyslarni qayd qiluvchi xodimlar, yukka javob beruvchi operatorlar va yuk tashuvchilar ishlamaydilar. Ular ham maoshlari oshirilishini talab qilmoqdalar. 

Norozilik aksiyasi bilan Londonning 4 ta aeroporti, jumladan, Xitrou ham qamrab olinadi. Bundan tashqari, Londonning Gatvik, Lyuton, Stansted aeroportlari, Aberdin, Belfast, Birmingem, Bristol, Bornmut, Sharqiy Midlend, Glazgo, Donkaster, Kardiff, Lids, Manchester, Nyukasl, Sautgempton va Edinburg aeroportlari xizmatidan foydalanuvchi yo‘lovchilar ham muammolarga duch kelishlari mumkin.

Aeroport xodimlari ularga taklif qilingan shartlarga, ya'ni 3 yil ichida (2015-2017 yillarda) maoshlari 4,65 foizga oshirilishiga ko‘nmay, maoshlari ko‘proqqa oshirilishini talab qilmoqdalar.

"Biz bu vaqt Buyuk Britaniya aeroportlaridagi eng qizg‘in vaqtligini hisobga olib, kompaniyalarni konstruktiv muloqot olib borishga chaqirmoqdamiz", deb aytgan kasaba uyushma vakili Oliver Richardson.

Rim-katolik cherkovi va ko‘pchilik protestant cherkovlari Rojdestvo bayramini 25 dekabrda nishonlaydilar.